TIRANË– Kryetarja e Kuvendit, Elisa Spiropali ka shprehur ngushëllimet për ndarjen nga jeta të ish-deputetit demokrat, Gert Bogdani.

“Dhimbje e thellë për ndarjen nga jeta të kolegut tonë, ish-deputetit të Kuvendit të Shqipërisë, babait, bashkëshortit, birit, Gerti Bogdani. Na trondite me ikjen tënde, Gert! Ike shumë i ri, vetëm 44 vjeç!
Ngushëllime nga zemra familjes!U prehsh në paqe! Të ndrittë shpirti”, shkruan në mesazhin e saj ngushëllues kryeparlamentarja Elisa Spiropali.

Ish-deputeti humbi jetën si pasojë e një arresti kardiak./ abcnews.al

[...]

Read More...

Një gjykatë e Bashkimit Evropian në Luksemburg ka anuluar një gjobë antitrust prej gati 1.5 miliardë eurosh (1.6 miliardë dollarë) për Google.

Gjyqtarët vendosën se Komisioni Evropian nuk kishte ofruar prova të mjaftueshme që Google kishte abuzuar me pozitën e tij dominuese në reklamat e motorëve të kërkimit me produktin e tij AdSense for Search.

Mosmarrëveshja ligjore kthehet në një ankesë të paraqitur në Zyrën Federale Gjermane të Kartelit në vitin 2010, e cila nxiti një hetim nga Komisioni Evropian.

Në vitin 2019, mbikëqyrësi i konkurrencës me bazë në Bruksel arriti në përfundimin se Google kishte shkelur ligjin e BE-së për konkurrencën dhe vendosi një gjobë prej 1.49 miliardë euro.

Google apeloi në Gjykatën e Përgjithshme të Bashkimit Evropian për anulimin e dënimit. Vendimi i fundit mund të apelohet ende në Gjykatën Evropiane të Drejtësisë, gjykata më e lartë e BE-së.

Miratohet rritja e pensioneve me 4.1% . Ministri  Blendi Gonxhe tha se janë mbi 791 mijë përfitues dhe kjo fillo nga 1 tetori

 

Forcat e Mbrojtjes Ajrore të Ukrainës kanë rrëzuar 46 dornë kamikazë rusë. Kjo u bë e ditur nga Komanda e Aviacionit e Ushtrisë së Ukrainës.

Sipas deklaratës, tre raketa ajrore të drejtuara u lëshuan nga hapësira ajrore e rajonit Kherson dhe 52 dronë sulmues u lëshuan nga rajonet ruse të Kursk dhe Yeisk.

Gjithashtu, sistemet e luftës elektronike bënë që pesë mjete ajrore pa pilot të rrëzoheshin jashtë kontrollit dhe një dron të fluturonte përsëri në Rusi, theksohet në deklaratë.

Sekretari i Shtetit të SHBA-së, Antony Blinken mbërriti në Kajro për t’u takuar me zyrtarë të lartë egjiptianë për të diskutuar dhe nxitur një armëpushim të mundshëm në Gaza.

Ky është udhëtimi i 10-të i sekretarit amerikan Blinken në Lindjen e Mesme që kur Izraeli nisi sulmet në Rripin e Gazës më 7 tetor.

Departamenti i Shtetit njoftoi se Blinken do të bashkëkryesojë hapjen e dialogut strategjik SHBA-Egjipt me ministrin e Jashtëm egjiptian Badr Abdelatty.

“Blinken do të takohet me zyrtarët egjiptianë për të diskutuar përpjekjet e vazhdueshme për të arritur një armëpushim në Gaza që siguron lirimin e të gjithë pengjeve, zbut vuajtjet e popullit palestinez dhe ndihmon në vendosjen e sigurisë më të gjerë rajonale”, thuhet në deklaratë.

SHBA-ja, Katari dhe Egjipti po ndërmjetësojnë bisedimet midis Izraelit dhe Hamasit për të siguruar një shkëmbim të burgosurish dhe armëpushim dhe për të lejuar hyrjen e ndihmave humanitare në Gaza. Por, përpjekjet e ndërmjetësimit kanë ngecur për shkak të refuzimit të Izraelit për të përmbushur kërkesat e Hamasit për t’i dhënë fund luftës.

Kryeministri izraelit Benjamin Netanyahu këmbëngul në ruajtjen e kontrollit mbi zonën e “Korridorit të Filadelfit” në kufirin Gaza-Egjipt, të cilin Kajro dhe Hamasi e kanë kundërshtuar me forcë.

Që nga fillimi i sulmeve izraelite në Gaza, më shumë se 41.200 palestinezë, kryesisht gra dhe fëmijë, janë vrarë dhe më shumë se 95.400 janë plagosur.

Sulmet izraelite kanë zhvendosur pothuajse të gjithë popullsinë e Rripit të Gazës mes një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.

Izraeli përballet me akuza për gjenocid para Gjykatës Ndërkombëtare të Drejtësisë (GJND) për veprimet e tij në Gaza.

Starton konferenca e 27-të e Shefave të Shtabit të Përgjithshëm të Iniciativës SHBA–Karta e Adriatikut (A-5).

Kjo konferencë po bashkëkryesohet nga shefi i Shtabit të Përgjithshëm të FARSH gjeneralmajor Arben Kingji komandanti Suprem i Forcave Aleate në Evropë, njëherazi Komandant i Forcave amerikane në Europë, gjeneral Christopher G. Cavoli.

Fokusi i kësaj konference do të jenë zhvillimet dhe dinamikat në mjedisin e sigurisë në rajon dhe më gjerë, rritja e shpenzimeve të Mbrojtjes mbi pragun 2% e Produktit të Brendshëm Bruto si një mënyrë për të përmbushur objektivat e kapaciteteve të Aleancës dhe objektivat e planifikimit dhe rishikimit të NATO-s për vendet partnere.

Në punimet e ditës së sotme marrin pjesë vendet nënshkruese të A-5; SHBA, Shqipëri, Bosnje-Hercegovinë, Kroaci, Mal i Zi dhe Maqedonia e Veriut ndërsa në statusin e vëzhguesit janë të pranishëm edhe përfaqësues nga Kosova dhe Sllovenia, komandanti i Komandës së Forcës së Bashkuar të NATO në Napoli, Itali, si dhe adjutantët e përgjithshëm nga shtetet përkatëse të Programit të Partneritetit të Gardave Kombëtare të SHBA (Neë Jersey, Maryland, Minnesota, Vermont, Maine), shtetet e Programit të Partneritetit Shtetëror Vëzhgues (Ohio, Colorado, Iowa).

Në qershor dy astronautë amerikanë u nisën nga Toka, duke menduar se do të kalojnë vetëm tetë ditë në Stacionin Ndërkombëtar të Hapësirës (ISS).

Por pasi kanë filluar shqetësimet se anija kozmike “Boeing Starliner” është e pasigurt për t’u kthyer, NASA e ka shtyrë datën e rikthimit të Suni Williams dhe Butch Wilmore deri në vitin 2025. Tani ata janë duke ndarë një hapësirë me madhësi të një shtëpie me gjashtë dhoma me nëntë njerëz të tjerë.

Williams e quan atë “vendin e saj të lumtur” dhe Wilmore thotë se është “mirënjohës” që është aty.
Por si është në të vërtetë ndjenja e të qenit 400 kilometra mbi Tokë? Si merren me shokët e ndërlikuar të ekuipazhit? Si ushtrojnë dhe si i lajnë rrobat? Çfarë hanë – dhe më e rëndësishmja, çfarë është “aroma e hapësirës”?

Duke folur për BBC News, tre ish-astronautë shfaqin sekretet e mbijetesës në orbitë. Çdo pesë minuta të ditës së astronautëve ndahen për kontrollin e misionit në Tokë.
Ata zgjohen herët. Rreth orës 06:50, ata zgjohen nga dhomat e gjumit me madhësi të një kabine telefonike në modulin e ISS-it të quajtur Harmony.

“Ka çantën më të mirë të gjumit në botë”, thotë Nicole Stott, astronaute amerikane me NASA-n, e cila ka kaluar 104 ditë në hapësirë në dy misione në vitet 2009 dhe 2011.
Dhomat e ndara kanë laptopë, përmes të cilëve ekuipazhi mund të kontaktojë me familjen dhe një qoshe ku mund të vendosen gjërat personale si fotografitë ose librat.

Astronautët mund ta përdorin banjën, një dhomë e vogël me sistem thithjeje. Normalisht, djersa dhe urina riciklohet në ujë të pijshëm, por një problem me ISS-në do të thotë se ekuipazhi mundet vetëm ta ruajë urinën për momentin.

Pastaj astronautët mund t’i përvishen punës. Mirëmbajtja ose eksperimentet shkencore ua marrin shumicën e kohës në ISS, i cili është sa madhësia e Pallatit Buckingham – ose sa një fushë e futbollit amerikan.

“Brenda duket sikur ka disa autobusë të bashkuar së bashku. Për gjysmë dite mund të mos shihni një person tjetër”, shpjegon astronauti kanadez Chris Hadfield, komandant në misionin Ekspedita 35 në vitet 2012-13. “Njerëzit nuk lëvizin nëpër stacion shpejt. Është vend i madh dhe i qetë”.

ISS-ja ka gjashtë laboratorë për eksperimente dhe astronautët vendosin monitorë të zemrës, trurit dhe të gjakut për t’i matur reagimet ndaj mjedisit sfidues fizik.

“Jemi si kavje laboratori”, thotë Stott, duke shtuar se “hapësira i vendosë eshtrat dhe muskujt në një proces të përshpejtuar plakjeje dhe shkencëtarët mund të mësojnë nga kjo”.

Nëse astronautët munden, ata punojnë më shpejt sesa parashikon kontrolli i misionit.

“Loja juaj është të gjeni pesë minuta të lira. Fluturoja te dritarja për të shikuar ndonjë gjë që kalon aty pari. Ose shkruaja muzikë, bëja fotografi ose shkruaja diçka për fëmijët e mi”, thotë Hadfield.

Fatlumëve të rrallë u kërkohet të bëjnë shëtitje në hapësirë, duke u larguar nga ISS-i për të dalë jashtë në hapësirë. Hadfield ka kryer dy prej tyre.

“Këto 15 orë jashtë, me asgjë mes meje dhe universit përveç helmetës së hapësirës, ka qenë shumë stimuluese dhe eksperiencë e një bote tjetër”.

Por ajo shëtitje në hapësirë mund të shfaqë diçka të re për stacionin hapësinor – “aroma metalike e hapësirës”.

“Në Tokë kemi aroma të ndryshme, si aroma e rrobalarëses ose ajrit të pastër. Por në hapësirë ka vetëm një aromë dhe ne mësohemi shumë shpejt me të”, shpjegon Helen Sharman, astronautja e parë britanike, që ka kaluar tetë ditë në stacionin hapësinor sovjetik Mir në vitin 1991.

Objektet që dalin jashtë, si kostumi ose pajisjet shkencore, preken nga rrezatimi i fortë i hapësirës. “Rrezatimi formon radikale të lira në sipërfaqe dhe ato reagojnë me oksigjenin brenda stacionit hapësinor, duke krijuar një aromë metalike”, thotë ajo.

Kur ajo është rikthyer në Tokë, ajo i ka vlerësuar eksperiencat shqisore më shumë. “Nuk ka mot në hapësirë – s’ka shi që të bie në fytyrë e as erë që të prekë flokët. I vlerësoj këto më shumë që atëherë”, thotë ajo, 33 vjet më vonë.

Më mes të punimeve, astronautët që qëndrojnë gjatë duhet të bëjnë dy orë ushtrime çdo ditë. Tri makineri të ndryshme u ndihmojnë t’i tejkalojnë efektet e jetesës me zero gravitet, që redukton densitetin e eshtrave.
Pajisja e avancuar e ushtrimeve rezistente (ARED) është e mirë për “squats” dhe ngritje të peshave të lehta dhe të rënda që i nxisin të gjitha grupet e muskujve të punojnë, thotë Stott.
Ekipi përdor dy makina për vrapim, në të cilat duhet të lidhen në mënyrë që të mos fluturojnë dhe një makinë pedalimi për stërvitjet e qëndrueshmërisë.

Një palë pantallona për tre muaj

Tërë ajo punë krijon shumë djersë, thotë Stott, çka çon në një problem të rëndësishëm – larjen e rrobave.

“Ne nuk kemi rrobalarëse – vetëm ujë që formon masa paformë dhe ca gjëra me sapun”, shpjegon ajo. Pa gravitetin që ua tërheq djersën nga trupi, astronautët mbulohen me një shtresë djerse – “shumë më shumë sesa në Tokë”, thotë ajo. “E kam ndier djersën duke mu rritur në skalp – duhet ta fshija kokën. Nuk guxoje ta tundje sepse do të fluturonte gjithandej”.

Këto rroba bëhen aq të ndyra saqë hidhen në një automjet mallrash që digjet në hapësirë. Por sipas saj, rrobat e tyre të përditshme qëndrojnë të pastra.

“Në gravitetin zero, rrobat fluturojnë në trup, kështu që yndyra dhe gjërat tjera nuk i prekin ato. Kam pasur një palë pantallona për tre muaj”, shpjegon ajo.
Në vend të kësaj, ushqimi ishte rreziku më i madh.

“Dikush hapte një konservë, për shembull, mish dhe lëng mishi”, thotë ajo. “Të gjithë alarmoheshim sepse topa të vegjël të lëngut të mishit fillonin të fluturonin. Njerëzit fluturonin mbrapsht, si në filmin Matrix, për t’iu larguar lëngut të mishit”.

Në një moment mund të arrijë një mjet tjetër hapësinor, për të sjellë një ekuipazh të ri ose furnizime me ushqime, rroba dhe pajisje. NASA dërgon disa automjete furnizimi në vit. Arritja në stacionin hapësinor nga Toka është “e mahnitshme”, thotë Hadfieldi.

“Është moment që ta ndryshon jetën, kur të bie në sy ISS-i në përjetësinë e universit – duke parë këtë flluskë të vogël të jetës, një mikrokozmos të krijimtarisë njerëzore në errësirë”, thotë ai.

Pas një dite të gjatë pune, është koha për darkë. Ushqimi vendoset kryesisht në pako, të ndara në vende të ndryshme sipas kombit.
“Ishte si ushqim kampingu apo racione ushtarake. Në rregull, por mund të jetë më e shëndetshme”, thotë Stott. “E preferuara ime ka qenë kërri japonez, ose supat apo drithërat ruse”.

Familjet u dërgojnë familjarëve të tyre pako shtesë me ushqim.

“Burri dhe djali im më zgjidhnin ëmbëlsira të vogla, si xhenxhefil të mbuluar me çokolatë”, thotë ajo.

Ekipi ndan ushqimin shumicën e kohës. Astronautët janë përzgjedhur paraprakisht nga atributet personale – tolerantë e të qetë – dhe të trajnuar për të punuar si ekip. Kjo zvogëlon gjasat e konfliktit, shpjegon Sharman.

“Nuk është puna te durimi i sjelljes së keqe të dikujt, por ta bësh të ditur atë. Dhe ne gjithmonë i japim njëri-tjetrit mbështetje”, thotë ajo.

Ndikimi psikologjik i pamjes së Tokës nga orbita

Dhe në fund, koha për gjumë, dhe koha për të pushuar pas një dite me ambient të zhurmshëm, ku flladitëset punojnë vazhdimisht për ta shpërndarë dioksidin e karbonit në mënyrë që astronautët të marrin frymë, duke e bërë atë të zhurmshëm, sikurse një zyrë shumë e zhurmshme.
“Ne mund të flemë tetë orë – por shumica mbesin në dritare duke e shikuar Tokën”, thotë Stott.

Të tre astronautët kanë folur për ndikimin psikologjik që ka shkaktuar të pamja e planetit Tokë nga 400 kilometra në orbitë.
“Ndihesha shumë e parëndësishme në atë pafundësi të hapësirës”, thotë Sharman.

“Duke e parë kaq qartë Tokën, rrotullimet e reve dhe oqeaneve, më bënë të mendoj për kufijtë gjeopolitikë që ndërtojmë dhe se si në të vërtetë jemi plotësisht të ndërlidhur”.

Stott thotë se i ka pëlqyer jetesa me gjashtë njerëz nga vende të ndryshme dhe “duke e bërë këtë punë në emër të të gjithë jetës në Tokë, duke punuar së bashku, duke e kuptuar se si të merremi me problemet”.

“Pse nuk mund të ndodhë kjo në planetin tonë?”, pyet ajo.
Në fund, të gjithë astronautët duhet të largohen nga ISS-ja – por këta të tre thonë se do të ktheheshin pa e menduar dy herë. Ata nuk e kuptojnë pse njerëzit mendojnë se astronautët e NASA-s, Suni Williams dhe Butch Wilmore janë “të bllokuar”.

“Ne ëndërruam, punuam dhe u stërvitëm gjithë jetën tonë duke shpresuar për një qëndrim të gjatë në hapësirë”, thotë Hadfield. “Dhurata më e madhe që mund t’i bëni një astronauti profesionist është t’i lini të qëndrojnë më gjatë atje”.Dhe Stott thotë se teksa është larguar nga ISS-i ajo ka menduar: “Duhet të tërheqësh duart e mia me gjithë thua nga këtu. Nuk e di nëse do të arrij të kthehem”.

Rusia ka të ngjarë të ketë humbur më shumë se 610 mijë ushtarë që nga fillimi i luftës në Ukrainë – të vrarë dhe të plagosur – tha Ministria e Mbrojtjes e Mbretërisë së Bashkuar.

Taktikat e bazuara në “valët e masave të këmbësorisë” kanë kërkuar që Moska të “riformojë vazhdimisht forcat në front me një fluks të qëndrueshëm rekrutësh të rinj”, shtoi ministria. Ka të ngjarë që normat e rekrutimit këtë vit të kenë rënë në krahasim me vitin 2023, njoftoi Ministria britanike e Mbrojtjes në përditësimin e fundit të inteligjencës.

Kjo ka bërë që Rusia të “rrisë bonuset e hyrjes në muajin gusht të vitit 2024”. Ministria e Mbrojtjes shtoi se “vlerësimet sugjerojnë se pagesat e personelit ushtarak arritën në rreth 8 për qind të shpenzimeve federale në vitin deri në qershor të vitit 2024”.

Ndryshe, Rusia ka nisur pushtimin e shtetit ukrainas më 24 shkurt të vitit 2024 duke shkaktuar mijëra viktima dhe dëme të shumta materiale.

Emergjenca e re globale e shëndetit pritet të jetë rezistenca e baktereve ndaj antibiotikëve. Tingëllon si një gjë e të ardhmes së largët, apo një skenar që nuk na përket, por faktet flasin për të kundërtën.

Në vitin 2019, 5 milionë njerëz vdiqën në mbarë botën për shkak të infeksioneve që rezistonin ndaj trajtimit me antibiotikë, ndërkohë që 1.3 milionë të tjerë lidheshin direkt me këtë shkak.

“Politico” i ka lënë një vend të madh problemit në fjalë, nisur edhe nga fakti i provueshëm se luftërat apo konfliktet po katalizojnë përhapjen e baktereve rezistente, po imponojnë zgjidhje radikale sidomos te fëmijët, të cilëve u amputohen gjymtyrë në mungesë të trajtimit, çka na thotë se problemi po troket në mbarë botën.

“E shoh që gjithçka po çon në një shpërthim katastrofik të rezistencën mikrobike në Gaza dhe do të përhapet në të gjithë spitalet e rajonit. Në mos është tashmë në Europë, SHBA dhe në Lindje apo jug. Do të jetë kudo”, citon autori, Rory O’Neill, një specialist të OBSH-së.

Aktualisht po flitet për një skenar që do ta çojë botën në periudhën para penicilinës, antibiotiku i parë, i sintetizuar në vitin 1928 që “ndryshoi mjekësinë përgjithnjë”.

Keqpërdorimi i antibiotikëve që pasuan, sidomos në blegtori, ka çuar në përshtatjen dhe rritjen e rezistencës.

Lufta me pasojat e veta çon në krijimin e vatrave të infeksionit, dhe është kuptuar se bakteret mund t’i përshtaten edhe toksicitetit të metaleve të rënda.

Madje bombardimi në zona lufte, ku përdoret në armatim të ndryshëm zink, apo plumb, po aftëson bakteret të rezistojnë duke e thelluar problemin më shumë.

SHQIPËRI- Sipas MeteoAlb, Shqipëria do të mbetet nën ndikimin e masave ajrore të paqëndrueshme duke sjellë vranësira dhe shira që në orët e para të mëngjesit si fillim në zonat veriore dhe gradualisht në të gjithë vendin reshjet do të jenë me intensitet të ulët dhe mesatar.

Gjatë pjesës së dytë të ditës; pritet dobësim i sistemit të vranësirave dhe shirave duke sjellë intervale të gjata me kthjellime në pjesën më të madhe të territorit; përjashtuar zonat Lindore të cilat mbeten me vranësira dhe shira të dobët.

Temperaturat e ajrit do të mbeten kostante në mëngjes, por rriten në mesditë duke luhatur vlerat ditore nga 8°C vlera më e ulët deri në 29°C vlera më e lartë në territor.

Era do të fryjë e fortë si në toke dhe në det me shpejtësi mbi 60 km/h nga drejtimi jugor dhe juglindor duke krijuar në brigjet detare dallgëzim deri në 6 ballë./ abcnews.al

Keni nevojë për pushime? Përfitoni nga rënia e çmimeve të shtatorit dhe bëni një udhëtim të përballueshëm përpara Krishtlindjeve, shkruan Simon Calder në të përditshmen britanike “The Independent”.

Udhëtimi për një javë në bregdetin e Adriatikut të Shqipërisë në nëntor ofrohet me një kosto prej 160 euro për person.

Çmimet kanë filluar të bien gjatë muajit shtator – me paketat e pushimeve të disponueshme për 355 euro ose më pak. Në vjeshtë dhe në fillim të dimrit, një arratisje në Mesdhe, Adriatik ose Atlantik do të ishte zgjedhja ideale.

Një paketë gjithëpërfshirëse në Turqi është e disponueshme për vetëm 60 euro në ditë dhe një javë në bregdetin e Shqipërisë kushton 160 euro.

Ekspertët e udhëtimeve kanë zgjedhur Shqipërinë, Greqinë, Spanjën, Turqinë dhe Portugalinë – si destinacionet e duhura për të udhëtuar për pushime – paketat e të cilave përfshijnë fluturimin, transportin dhe akomodimin.

“The Independent” e ka renditur Shqipërinë mes pesë destinacioneve më të bukura – për të përfituar nga rënia e çmimeve të shtatorit dhe për të bërë një udhëtim të përballueshëm përpara Krishtlindjeve.

Shqipëria

Shqipëria është një nga perlat e Evropës me plazhe të pacenuara dhe bukuri natyrore. Për pushime të lira dimërore vizitoni Shqipërinë në nëntor.

Fluturimet gjatë këtij muaji kushtojnë 36 euro me “Wizz Air” nga aeroporti i Lutonit.

Një autobus nga aeroporti i Tiranës për në qytetin bregdetar dhe resortin kryesor të Durrësit kushton 6 euro.

Qëndrimi për një javë në hotelin me katër yje kushton 224 euro. Për pushime dimërore pranë Adriatikut do të shpenzoni më pak se 24 euro në ditë, ose  160 euro për person për një javë.

Dashi

Më në fund do të keni mundësi të sqaroni disa keqkuptime të vogla, të cilat gjatë ditëve të fundit nuk iu kanë lejuar të punoni siç duhet. Do të arrini të rivendosni harmoninë dhe bashkëpunimin me partnerët tuaj profesional dhe kjo gjë do ju bëjë më të sigurtë në vete dhe në kapacitetin tuaj. Takimet janë mjaft të favorshme.

Demi

Kjo e mërkurë do të jetë disi e turbullt, ku do të jeni të përfshirë në situata mjaft komplekse. Megjithatë këshillohet që të mos tregoheni shumë konfliktual, pasi në të kundërt rrezikoni të humbni kohë të vlefshme, të cilën mund ta përdorni për synime të tjera. Horoskopi i kësaj dite parashikon mundësi të mira për të rritur financat tuaja.

Binjakët

Jeni shumë të lodhur dhe stresuar, por nga ana tjetër sapo keni nisur një rol të rëndësishëm. Përfitoni nga orët e mbrëmjes, për të kaluar më shumë kohë me personat që doni. Këshillohet që të jeni më romantikë.

Gaforrja

Do të jeni shumë të shpërqendruar dhe ëndërrimtarë. Keni marrë një sërë përgjigjesh pozitive në dashuri, të cilat do ju lejojnë që të fantazoni me sytë hapur. Këshillohet vetëm që të mos merrni vendime shumë të nxituara, pa u konsultuar mirë me bashkëpunëtorët tuaj. Një klimë harmonike në punë, premton rezultate të mëdha.

Luani

Gjatë këtyre ditëve duhet të mundoheni që të jeni më të komunikueshëm në vendin e punës, pasi parashikohen mundësi të reja interesante për karrierën tuaj. Mund të zbuloni se keni interesa të përbashkëta me një bashkëpunëtorin tuaj, gjë që premton shumë.

Virgjëresha

Kjo e mërkurë premton mundësi të shumta sa i takon dashurisë. Ky është momenti për të zyrtarizuar një lidhje dhe për të nisur të planifikoni të ardhmen tuaj në çift. Nga pikëpamja profesionale ka disa vendime që duhen marrë seriozisht dhe me profesionalizëm, ndaj mos jini të shpërqendruar.

Peshorja

Parashikohet një javë e cila ju fton që të jeni shumë më strategjik dhe të kujdesshëm në mënyrën tuaj të të vepruarit në punë. Dikush nuk do hezitojë që t’iu vendosë shkopinj nën rrota, ndaj bëjini sytë katër, shkruan noa.al. Mos u dekurajoni, pasi intuita e mirë nuk do ju lërë në baltë.

Akrepi

Zgjuarsia dhe intuita juaj do ju lejojë që të zgjidhni disa probleme të papritura në vendin e punës. Tashmë do të jeni më karizmatikë dhe bindës dhe për këtë arsye askush nuk do guxojë që të pengojë projektet tuaja. Mundohuni vetëm që të jeni më të gatshëm dhe pranishëm për familjen dhe partnerin/en.

Shigjetari

Mundohuni që të shmangni në maksimum zhgënjimet, pasi mund të bëheni agresiv ndaj miqve, të afërmve ose partnerit/es. Ky nuk është momenti më i mirë për të marrë rreziqe përsipër nga pikëpamja profesionale. Mundohuni që të ruani një profil të ulët dhe të çoni deri në fund ato projekte që i cilësoni vërtet të rëndësishme.

Bricjapi

Kjo e mërkurë do ju gjejë tejet të stresuar dhe gjithçka, për shkak se nuk do arrini të ruani një klimë harmonie dhe dialogu me kolegët tuaj. Do të jeni shumë kokëfortë dhe për këtë arsye shpesh do të krijohen keqkuptime. Në dashuri duhet të tregoheni më të kujdesshëm.

Ujori

Në këtë periudhë do të keni mundësi që të bëni takime të reja dhe udhëtime romantike, të cilat do ju lejojnë që të rizgjoni ndjenjat. Horoskopi i kësaj dite ju fton që në vendin e punës të jeni më të pavarur dhe të përfitoni nga pozicioni që keni.

Peshqit

Duhet të shmangni në maksimum blerjet, pasi gjatë kësaj dite parashikohen zhvillime të cilat do ju tensionojnë. Nga pikëpamja profesionale ka zhvillime të rëndësishme të cilat duhen trajtuar me kujdes. Duhet të jeni të vëmendshëm në çdo detaj, në mënyrë që t’ia dilni.

[...]

Read More...

TIRANË- Leku vijon të qëndrojë i fortë përballë euros. Monedha europiane e ka nisur këtë javë me dobësim duke shënuar nivel të ri kundrejt monedhës kombëtare lekut.

Sipas kursit zyrtar të Bankës së Shqipërisë një euro po këmbehet aktualisht me 99,28 lekë  një rekord i ri, i cili nuk është regjistruar gjatë këtij viti.

Monedha europiane është dobësuar edhe pse sezoni turistik veror ka mbaruar.

Ky është një tregues se turizmi në vend po bëhet gjithëvjetor. Po ashtu në forcimin e lekut ka dhënë efekte edhe rritja e investimeve të huaja, remitancat dhe blerja e pasurive të paluajtshme.

Nëse e krahasojmë nivelin e  monedhës europiane me të njëjtën periudhë të një viti më parë atëherë rezulton se rënia është rreth 7%.

Mesa duket tregu i brendshëm valutor është futur në një normalitet të ri,  pasi  gradualisht po zbehen edhe luhatjet sezonale në këmbimin e euros me lekun.

Drejtori Ekzekutiv i Shoqatës së Zyrave të Këmbimit, Dritan Vakaj, i ftuar në “Money Report” në ABC News, komentoi këtë realitet të ri në tregun valutor.

Ai theksoi se sasi e euros në treg mbetet  e madhe dhe kjo ka bërë që të kemi qarkullim të lartë të monedhës europiane.

“Jemi në këto nivele dhe ajo që vihet re është që në patëm një rritje të turizmit, jo ndoshta në pritshmëri tepër të larta, për padiskutim shumë herë më shumë se vitin e shkuar. Edhe pse patëm rritje të turizmit, konsumi nuk ka qenë i lartë. Oferta e euros në treg mbetet e lartë dhe kemi një frenim të lekut në treg, qeveria nuk po shpenzon dhe po mbledh shumë taksa.”, tha ai.

Eksperti vlerësoi rolin që luajti Banka e Shqipërisë, që sipas tij, arriti të krijojë një stabilitet të euros gjatë sezonit turistik veror.

“Banka e Shqipërisë luajti një rol stabilizues gjatë sezonit. Euro vazhdon të mbetët në nivele të ulëta dhe të gjithë pritshmëritë janë që do vazhdojë të jetë.  Duke e marrë në konsideratë stokun e lartë të euros”, tha ai.

Sipas tij, me këto tregues as në muajin tetor nuk duhet të presim një rritje të vlerës së euros dhe kjo lidhet me stokun e madh të saj në treg.

“Duke parë se po të rritet stoku i eurove, përdorimi i saj rritet, efektet sezonale bëhen disi më të buta, sepse amortizohen nga stoku i lartë që kemi. Nga mesi i tetorit nuk është e pritshme që euro të forcohet në mënyrë të ndjeshme, sepse nuk ka asnjë tregues që mund të na tregojë këtë”, tha ai/ abcnews.al

Prokuroria e Posaçme ka kërkuar të martën dënimin e 5 personave që akuzohen për atentatin ndaj ish-prokurorit Arjan Ndoja dhe mikut të tij Pëllumb Muharremi, ngjarje kjo e ndodhur në nëntor të 2019-ës.

Për këtë ngjarje SPAK ka marrë të pandehur Ramazan Rrajën, Bashkim Haxhian, Gent Ndërjakun, Endrit Sinanin dhe Julian Pjetrin që në të njëjtën kohë iu është pranuar edhe gjykimi i shkurtuar dhe nëse gjenden fajtorë përfitojnë ulje të dënimit me një të tretën.

SPAK kërkon dënimin e Ramazan Rrajës me 11 vite burgim, nëse gjendet fajtor do të vuajë 7 vite e 4 muaj burg.

Për Genti Nderjakun, SPAK kërkoi dënimin me 6 vite burg dhe për Bashkim Haxhia 5 vite e 4 muaj. Ndërsa për Julian Pjetrin e Endrit Sinanin u kërkua dënimi me nga 5 vite heqje lirie për secilin.

/abcnews.al/

Gjermania do të japë 100 milionë euro shtesë ndihmë për Ukrainën këtë dimër, njoftoi Ministrja e Jashtme gjermane Annalena Baerbock gjatë një vizite në Moldavi të martën.

Rusia po planifikon edhe një herë një “luftë dimërore me qëllimin për t’i bërë jetën e njerëzve në Ukrainë sa më të tmerrshme të jetë e mundur”, tha Baerbock përpara një konference ministrore në Kishinau, raporton Reuters.

Rusia ka nisur valë sulmesh ndaj infrastrukturës energjetike të Ukrainës, siç janë termocentralet, duke shkaktuar ndonjëherë ndërprerje të energjisë elektrike në disa pjesë të vendit.

[...]

Read More...

Popullsia e personave mbi 100-vjeç në Japoni ka tejkaluar për herë të parë mbi 95 mijë. Ministria e Shëndetësisë, Punës dhe Mirëqenies së Japonisë njoftoi statistikat për rritjen e popullsisë së moshuar në vend.

Sipas kësaj, popullsia mbi 100-vjeç është rritur për 54 vjet rresht. Numri i personave që ka kaluar moshën 100-vjeç që nga shtatori ka arritur në 95.119.

Popullsia e atyre që “kanë jetuar një shekull” në vend ka kaluar 95 mijë për herë të parë në historinë e vendit. Në krahasim me të dhënat e vitit të kaluar, numri është rritur me 2.980. Vihet në dukje se 83.958 prej atyre që janë mbi 100- vjeç janë gra ndërsa 11.161 meshkuj.

Zëdhënësi i Ministrisë së Shëndetësisë në një deklaratë lidhur me temën tha: “Ne do të bëjmë përpjekje për të rritur shërbimet e mirëqenies sociale, përfshirë kujdesin mjekësor dhe infermierisë në mënyrë që të moshuarit të mund të vazhdojnë të jetojnë në mënyrë të qetë në shoqërinë e tyre”.

Të dhënat e popullsisë në lidhje me ata që kanë “jetëgjatësi mbi një shekull” në Japoni filluan të regjistrohen për herë të parë në vitin 1963.

Japonia me një popullsi prej rreth 125 milionë banorësh, njihet për jetëgjatësinë e qytetarëve të saj. Personi më i vjetër është 116-vjeçarja Itooka Tomiko e cila jeton në Japoni.