Pretendimi: Bashkëshorti i presidentes së Komisionit Europian Ursula von der Leyen është drejtor i kompanisë në pronësi të Pfizer.

Verdikti: E pavërtetë

—————————————————-

Më 17 korrik 2024, Gjykata e Bashkimit Europian kritikoi Komisionin Evropian për mungesë transparence mbi marrëveshjet e vaksinave COVID-19 të bëra në vitin 2020 dhe 2021. Gjykata vendosi kundër vendimit të Komisionit për të fshehur pjesë të mëdha të kontratës me prodhuesit e vaksinës përpara se t’i publikonin në vitin 2022. Marrëveshjet në fjalë përfshinin shtatë prodhues vaksinash, ndër to edhe Pfizer.

Lajmi i këtij gjykimi u shpërnda në rrjete sociale, në disa raste shoqëruar me pretendimin se burri i kreut të Komisionit Europian Ursula von der Leyen ishte punësuar nga një kompani e quajtur Orgenesis, e cila është në pronësi të Pfizer.

Në të vërtetë, Heiko von der Leyen ka shërbyer si drejtori mjekësor i kompanisë bioteknologjike amerikane Orgenesis Inc. që në 2020. Sipas faqes së saj të internetit, kompania studion kryesisht terapinë e qelizave dhe gjeneve. Megjithëse kjo kompani po zhvillon dy produkte të lidhura me COVID-19, Pfizer nuk përmendet si i përfshirë.

Orgenesis është një kompani publike e listuar në bursën ameriane. Si rrjedhim, ajo është në pronësi dhe kontrollohet nga aksionerët. Sipas të dhënave të Nasdaq, Pfizer nuk është i listuar si aksioner i Orgenisis.

Pfizer nuk listohet si aksioner në Orgenesis Inc.

“Pfizer nuk ka marrëdhënie biznesi me Orgenesis,” konfirmoi gjithashtu një zëdhënës i Pfizer për Logically Facts.

Në 2022, lidhjet midis Komisionit Europian dhe Orgenesis u shqyrtuan pasi 8 eurodeputetë vërejtën se si Orgenesis kishte përfituar nga financimi i BE në dy raste të veçanta. Megjithatë, Komisionerja e Transparencës së BE, Vera Jourova deklaroi se Heiko von der Leyen nuk kishte shkelur asnjë rregull të konfliktit të interesit duke punuar në një kompani, e cila kishte marrë financim nga BE.

Heiko von der Leyen dha dorëheqjen nga pozicioni i tij në bordin mbikëqyrës të një projekti të financuar nga BE. Megjithatë, Komisionerja e Transparencës nuk pa ndonjë shkelje të rregullave të BE apo konflikt interesi. Heiko von der Leyen nuk ishte i përfshirë në procesin e aplikimit për grant, por filloi punë pasi filiali italian i Orgenesis e fitoi projektin.

The post Bashkëshorti i Ursula von der Leyen nuk punon për Pfizer appeared first on Faktoje.al.

Pretendimi: Rastet e kancerit po rriten për shkak të një virusi të gjetur në vaksinat anti-Covid.

Verdikti: E paprovuar

————————————————

Një artikull i portalit Mjekësia Bimore Arabe pretendon se rastet e kancerit po rriten për shkak të vaksinave anti-Covid.

Megjithatë, në brendësi të artikullit nuk jepet asnjë shifër, statistikë apo provë tjetër për ta mbështetur këtë pretendim.

Në vend të tyre, shpjegohet se një mikrobiolog me emrin Kevin McKernan ka zbuluar “praninë e promotorëve të virusit Simian (SV40) në vaksinën mRNA të Pfizer.” Artikulli shton se SV40 u zbulua të ishte kancerogjen për kafshët në 1961.

Edhe nëse merren të mirëqena si të vërteta, këto dy pretendime, edhe të marra bashkë, nuk provojnë apo tregojnë se rastet e kancerit po rriten si pasojë e vaksinës anti-Covid.

Vlen të përmendet se Kevin McKernan, së bashku me tre autorë të tjerë, botuan në 2023 një studim të pa-rishikuar nga kolegët, ku dolën në përfundimin se kishin gjetur një sekuencë gjenesh me origjinë nga virusi simian SV40 në vaksinën anti-Covid të Pfizer.

Megjithatë, sic shpjegojnë dhe vetë autorët, një nga kufizimet më domethënëse të këtij ‘studimi’ është se flakonet e testuar ishin me “prejardhje të panjohur”. Sipas autorëve, flakonët u ishin dërguar “në mënyrë anonime me postë dhe pa paketim të ftohtë”, por ishin “të pahapur.” 

Kjo “prejardhje e panjohur” e flakonëve të testuar minon premisën më themelore të studimit, se flakonët në fjalë janë vërtet vaksina mRNA anti-Covid.

Më tej, edhe nëse marrim të mirëqenë që flakonët kanë qenë vërtet vaksina anti-Covid, nuk ka prova se SV40 shkakton kancer tek njerëzit. 

SV40 është një virus që shfaqet edhe tek majmunët edhe tek njerëzit dhe është provuar të shkaktojë kancer tek disa kafshë.

Në vitet 1955-1963, llogaritet se 10-30% e vaksinave të poliomelitit në ShBA ishin kontaminuar me virusin SV40. Një numër studimesh epidemiologjike të mëpasshme kanë studiur popullatën që mori vaksinën e poliomelitit gjatë kësaj periudhe. Ato nuk gjetën ndonjë rrezik të shtuar të kancerit tek këto persona.

Gjithsesi, McKernan pretendon të ketë gjetur vetëm një pjesë të SV40 në flakonet e tij misteriozë, ndërsa rreziku i kancerit, edhe vetëm tek kafshët, lidhet me virusin e plotë. Vetë McKernan tha për Associated Press se “nuk është e njejta gjë si të gjesh të gjithë virusin SV40 në vaksinë.”

The post E paprovuar gjetja e virusit kancerogjen në vaksinat anti-Covid appeared first on Faktoje.al.