Ndonëse quhet institucion i ekzekutimit të vendimeve penale, qëllimi nuk është thjesht vuajtja e dënimeve, por përgatitja e këtyre personave për të rinisur sërish jetën.

Këtij qëllimi i shërben edhe ekspozita me fotografi në burgun e grave të Pojskës në Pogradec, shkruan A2 CNN.

Trashëgimia kulturore dhe vendet turistike të qytetit të Pogradecit, u sollën për gratë që u privohet liria në këtë institucion, nëpërmjet fotografive të marra nga arkivi i muzeut të Pogradecit.

“Është një aktivitet i veçantë, në mënyrë që vajzat dhe gratë të njihen me trashëgiminë kulturore të zonës, por edhe me disa nga atraksionet turistike” , thotë për A2 CNN Froseda Tole, përgjegjëse e muzeut Pogradec.

Në fakt, ekspozita ja ka arritur qëllimit, për sa kohë disa nga banoret e këtij institucioni pohojnë se u njohën këtu për herë të parë me disa nga pikat turistike dhe trashëgiminë kulturore të Pogradecit.

“Aktiviteti mu duk shumë interesant. Mësova shumë gjëra që nuk i dija për Pogradecin edhe për zonat rreth tij”, thotë një e dënuar, e cila nuk dëshiron të identifikohet.

Aktivitete të tilla pritet të jenë më të shpeshta, duke planifikuar madje edhe mbrëmjet poetike brenda institucionit të vuajtjes së dënimit.

The post Të njohësh nga burgu pikat turistike të Pogradecit appeared first on Telegrafi.