Pretendimi: Ish-presidenti amerikan Barack Obama është ekzekutuar në 2019 në Guantanamo Bay

Verdikti: E pavërtetë

————————————————————-

Në rrjetet konspiracioniste po qarkullon pretendimi i pazakontë se ish-presidenti amerikan Barack Obama “u ekzekutua me pushkatim në GITMO, me plumb mbas koke” më 29 shtator 2019. Postimi shoqërohet me një foto portret të Obamës të shoqëruar me një sërë nenesh të Kodit Penal amerikan të lidhura me tradhtinë dhe mosbindje ndaj rendit kushtetues. 

Si zakonisht, ky pretendim i jashtëzakonshëm nuk shoqërohet me ndonjë provë, aq më pak të jashtëzakonshme.

Barack Obama shërbeu si president i ShBA nga viti 2008 në 2017, afro-amerikani i parë që mbante këtë pozicion në historinë e vendit.

Pas përfundimit të dy mandateve, ai vijoi të ishte aktiv në politikë, duke bërë fushatë për kandidatë të ndryshëm në zgjedhje të ndryshme në ShBA, përfshi dhe fushatën presidenciale të ish-zëvendësit të tij Joe Biden, i cili u zgjodh në 2020.

Në 29 tetor 2019, një muaj nga data kur konspiracionistët pretendojnë se ai u ekzekutua, Obama foli publikisht në samitin e Fondacionit Obama.

Në 2020, presidenti i atëhershëm Donald Trump pretendoi se Obama kishte kryer tradhëti sepse kishte përgjuar fushatën e Trump. Megjithatë, provat për këto pretendime nuk u mishëruan kurrë. Gjithsesi, nëse Obama do kishte vdekur në 2019, prezumohet me dijeninë e presidentit Trump, këto akuza do të ishin të pakuptimta.

Në korrik 2024, Obama shpalli publikisht mbështetjen e tij për kandidaturën e zv. presidentes Kamala Harris për zgjedhjet presidenciale të kësaj vjeshte. Gjithashtu, në gusht 2024, ai mori pjesë në Konventën Kombëtare të Partisë Demokratike amerikane.

Më 17 shtator, Obama u shfaq në një intervistë me TikTokerin carlos_eduardo_espina, në një përpjekje për të angazhuar votuesit e moshave të reja para zgjedhjeve të nëntorit 2024.

Pretendimi se Obama është vrarë në 2019 është qartazi i rremë.

The post Ish-presidenti Obama nuk është ekzekutuar prej vitit 2019 appeared first on Faktoje.al.

Pretendimi: Zbulohet një bisedë telefonike që tregon se udhëheqja e Partisë Demokratike të ShBA është prapa atentatit kundër Donald Trump

Verdikti: E paprovuar

——————————————————

Në fillim të gushtit, në rrjet qarkulloi lajmi se Partia Demokratike e ShBA ishte përgjegjëse për atentatin ndaj ish-presidentit dhe kandidatit republikan për president Donald Trump më 13 korrik. Si provë për këtë, sillet edhe një klip 22-sekondësh i bisedës së pretenduar mes ish-presidentit amerikan Barack Obama dhe ish-këshilltarit të tij David Axelrod.

Në klipin e mësipërm dëgjohet një zë që i ngjason atij të Obamës të thotë: 

“Rënia e tij nuk ishte arsyeja që ai u largua. Unë di gjithçka për armiqësinë tuaj të ndërsjellë, por më lër të të them se ai nuk po largohet për shkak të degradimit të tij mendor. Ai dhe ekipi i tij u dëbuan sepse nuk arritën të hiqnin qafe Trump. Ishte mundësia e tyre e vetme dhe këta idiotë e humbën. Sikur të mund të hiqnin qafe Trump, ne do të siguronim fitoren e tyre kundër çdo kandidati republikan.”

Me avancimin e teknologjisë, nuk mund të mjaftohemi vetëm duke i besuar veshëve. Duhet futur në punë mendimi kritik.

Një skandal i këtyre përmasave, nëse do të kishte prova të besueshme, do të bënte xhiron e mediave kombëtare dhe ndërkombëtare. Megjithatë, asnjë media kryesore nuk ka raportuar mbi të. Lajmi i skandalit të madh qarkullon, me të njejtin tekst copy-paste dhe nganjëherë të përkthyer automatikisht, vetëm në rrathët konspiracionstë në Twitter dhe llogaritë pro-Kremlin në Telegram.

Një nga këto llogari, Putin on Telegram, duket se ka qenë edhe burimi i datës së raportuar të bisedës, 22 gusht. Në mënyrë absurde, postimi i tyre në 5 gusht pretendonte se biseda e botuar kishte ndodhur në 22 gusht. Më pas, ky postim u korigjua me datën 22 korrik, por lapsusi i 22 gushtit mbetet në postimet e kopjuara në rrjet, nje tregues i hershëm se ky ‘lajm’ është i sajuar.

Si burim për këtë lajm citohet një artikull nga Deep State Leaks (faqja nuk ekziston më por është arkivuar këtu). Sipas këtij artikulli, një bisedë 15-minutëshe mes ish-këshilltarit David Axelrod dhe ish-presidentit Obama iu dërgua Deep State Leaks nga një punonjës i Komitetit Kombëtar Demokrat (DNC), identitetin e të cilit autorët nuk po e zbulojnë “ende.”

Deep State Leaks premtoi se do të publikojë një sërë artikujsh në të ardhmen dhe vetëm në atë të fundit do të botojë bisedën e plotë, por për momentin po poston vetëm tre fragmente. Fragmenti i parë u shndërrua në videon e mësipërme dhe u shpërnda në kanalet Telegram në gjuhën ruse.

Deep State Leaks nuk është një projekt investigativ apo një botim socio-politik, por një faqe interneti. Në kohën e botimit të këtij shkrimi kjo faqe është jo-funksionale. Ky burim nuk ka seksion “Rreth nesh”, nuk ka emra të punonjësve, nuk ka rrjete sociale të projektit. Faqja deepstateleaks.org është regjistruar më 18 korrik 2024.

Kolegët e Provereno.media verifikoi origjinën e tre regjistrimeve të publikuara në këtë faqe duke përdorur mjete për identifikimin e përmbajtjes së krijuar nga inteligjenca artificiale nga kompania Hive. Kjo tregoi se probabilitet 100% të tre audiot janë krijuar duke përdorur rrjete neurale (AI). 

Krijimi i audiove të tilla nuk do është i vështirë, pasi mijëra regjistrime të zërit të Obamës janë publike dhe mund të përdoren si mostra për të gjeneruar audio artificiale me zërin e tij. 

Shumë faqe në internet ofrojnë për qëllime argëtimi shërbime falë të cilave çdo tekst mund të shqiptohet nga zëri i ish-presidentit amerikan. Faktoje gjeneroi mesazhin e mëposhtëm me anë të njërit prej këtyre shërbimeve.

“Mos besoni gjithshka që lexoni në internet! Lexoni Faktoje për mos t’u mashtruar!” – Barack Obama

The post E manipuluar telefonata e Obamës që provon përfshirjen në atentatin ndaj Trump appeared first on Faktoje.al.