Gjykata e Apelit ka lënë në fuqi vendimin e Gjykatës së Tiranës, për Alda Klosin.

Ish-zyrtarja e Ministrisë së Financave së bashku me sanitaren Rozeta Dobi dhe djalin e saj Havier Dobi u shpallën fajtorë ‘vjedhje me pasoja të rënda” në bashkëpunim.

“Më datë 15.12.2022, është njoftuar Salla Operative e Policisë Tiranë se në Rrugën e “Kosovarëve”, tek pallati “Orion”, është vjedhur banesa e shtetases me iniciale A. K. Për kryerjen e kësaj vepre panale, është akuzuar pastruesja e saj me iniciale R. D si dhe djali i kësaj të fundit me iniciale H. D”, thuhet në vendim.

Alda Klosi është dënuar me 1.8 vite burg, Rozeta Dobi me 4.8 vite burg dhe djali i saj Havier Dobi me 3.8 vite burg, me gjykim të shkurtuar.

Në dhjetor 2022 ish-zyrtarja e lartë, Alda Klosi kallëzoi në polici vjedhjen e qindra mijëra eurove në banesë në rrugën e Kosovarëve në Tiranë. Në janar 2023 policia arrestoi Rozeta Dobin dhe Havier Dobin, nënë e bir, nën akuzën e vjedhjes pasi në shtëpinë e tyre u gjet 404 800 euro, 8500 dollarë dhe aksesorë floriri, të cilat i ishin fshehur në tubin e aspirimit të banesës së tyre.

Ndërsa Havierit iu sekuestruan disa makina. Vetë Alda Klosi kishte bërë denoncimin për vjedhjen e 120 mijë eurove, 30 mijë dollarë dhe bizhuterive. Pas arrestimit pastruesja ‘e penduar’ e drejtësisë tha se 400 mijë eurot i mori në shtëpinë e Alda Klosit Një muaj më pas, në shkurt 2023 u krye arrestimi i ish zyrtares.

The post Apeli lë në fuqi vendimin për Alda Klosin, mbante në shtëpi 500 mijë euro të padeklaruara appeared first on Lapsi.al.

Pas tensioneve në Kuvend, deputeti demokrat i burgosur Ervin Salianji, ka dërguar nga burgu i Fierit një letër.

Salianji në letrën dorëzuar avokatit të tij shprehet se shfaqja e agresorëve si viktima është hipokrizi neveritëse, teksa shtoi se krimi më i madh është shkatërrimi i demokracisë, shtetit të së drejtës dhe sundimit të ligjit.

“Opozita po mbrohet dhe po mbron demokracinë dhe interesin publik”, thuhet në ndër të tjera në letër.

Letër nga IEPV FIER

Dorëzuar avokatit ora 13:45 minuta

Shfaqja e agresorëve si viktima, e dhunuesve si të dhunuar, e abuzuesve si të prekur nga prekja e pronës publike është hipokrizi neveritëse.

Njësoj siç vjedhin dhe përgjegjësine e mbajnë denoncuesit, siç shkretojnë dhe shkatërrojnë, siç e ndajnë Shqipërinë si plaçkë lufte për bandat dhe mes bandave, siç përndjekin administratën, shkatërrojnë meritokracine, sot po përpiqen të sillen si viktima.

Dhuna dhe brutaliteti më i madh është eleminimi i kundërshtarit politik duke asgjësuar dhe nënshtruar institucionet. Duke përdorur institucionet, si komisionet e partisë, për të fshikulluar dhe hequr lirinë dhe asgjesuar të drejtat.

Krimi më i madh është shkatërrimi i demokracisë, shtetit të së drejtës dhe sundimit të ligjit.

Pas vrasjes, burgosja politike është forma më e rëndë dhe më brutale e dhunës.

Opozita po mbrohet dhe po mbron demokracinë dhe interesin publik.

#7 Tetor

The post Salianji letër nga burgu, “Shfaqja e agresorëve si viktima, hipokrizi” appeared first on Lapsi.al.

SPAK ka filluar marrjen në pyetje të personave të akuzuar për skandalin te Onkologjiku.

Këtë të enjte është paraqitur me kërkesë të prokurorit Elvin Gokaj për të dhënë deklarime mjeku Emdond Gashi.

Ndërkohë deri më tani SPAK është në pritje të përgjigjeve nga një sërë institucionesh lidhur me kërkesat për të dhëna e dokumentacion mbi mjekët si edhe për pasurinë e tyre.

The post Skandali te Onkologjiku, mjeku Edmond Gashi paraqitet në SPAK appeared first on Lapsi.al.

“Paqja e pamundur, lufta e pamundur”. Me këtë formulë, gjatë Luftës së Ftohtë, një nga analistët më të mprehtë të kohës, francezi Raymond Aron, përmblodhi gjendjen e marrëdhënieve midis NATO-s dhe Paktit të Varshavës. Lufta mes dy blloqeve do të kishte qenë një luftë bërthamore dhe kjo e bëri atë të pamundur. Në të njëjtën kohë, midis Perëndimit liberal dhe Lindjes komuniste nuk ishte e mundur as paqja.

Po sot? A mund të ripropozohet kjo formulë në një botë kaq të ndryshuar rrënjësisht? Lindja e Mesme në flakë po tërheq vëmendjen e të gjithëve për momentin, por për shkak të luftës në Ukrainë janë të shumtë ata që vazhdojnë të kenë frikë nga më e keqja. Frika e luftës bërthamore është përhapur në të gjithë Evropën, e nxitur nga mospërmbajtja verbale e Putinit dhe oborrtarëve të tij, me kërcënimet e tyre të vazhdueshme për të çliruar Armageddon-in. Kjo frikë kontribuon që mbështetja e shumë evropianëve për Kievin të jetë e vakët. Ka shumë njerëz që, edhe pse nuk janë aspak në anën e Putinit, kanë frikë se nëse ai nuk merr atë që do, do ta shndërrojë Evropën në një varrezë radioaktive. Sado e vështirë të jetë për të kuruar frikën duke iu drejtuar argumenteve racionale, ne nuk mund të shmangim përpjekjet.
Mundësia e luftës bërthamore ka ekzistuar që kur u shpik bomba atomike. Dhe kështu do të jetë gjithmonë.

Megjithatë, ne duhet të bëjmë një dallim. Fakti që, në një pjesë të botës, armët bërthamore herët a vonë do të përdoren në një konflikt rajonal, midis fuqive lokale, fatkeqësisht nuk është një mundësi krejtësisht e largët. Kjo shpjegon përpjekjet e përsëritura të të ashtuquajturit “komunitet ndërkombëtar” (dmth fuqitë e mëdha) për të parandaluar përhapjen e pakontrolluar të armëve bërthamore. Edhe nëse më së paku, mund të duken si dy armiq për vdekje, si India dhe Pakistani kanë qenë të dy fuqi bërthamore për një kohë të gjatë, por kjo, deri më tani, nuk e ka shkaktuar tragjedinë. Megjithatë, gjasat e shpërthimit të një lufte bërthamore midis fuqive të mëdha janë një mundësi e largët.

LEXO EDHE: 34 milionë viktima në 5 orë/ Ç’ndodh nëse Putin nis luftën bërthamore

Edhe nëse një nga këto fuqi të mëdha është në duart e një grushti aventurierësh të udhëhequr nga një autokrat (si Rusia e Putinit). Arsyeja ka të bëjë me instinktin e mbijetesës që është tipik për çdo grup drejtues. Nëse vendos të shtypësh butonin bërthamor, ti e di se armiqtë e tu do të bëjnë të njëjtën gjë kundër jush. Dhe në çdo rast nuk mund të përjashtosh që kjo të ndodhë. Edhe nëse nuk ju intereson se çfarë do të ndodhë me vendin tuaj dhe banorët e tij, ju me siguri kujdeseni për veten tuaj, për atë që do të ndodhë me ju. Edhe nëse mbijetoni fizikisht, jo vetëm vendi juaj, por edhe pozita juaj e autoritetit dhe fuqia juaj, do të shkatërrohen. Ose, të paktën do të zvogëlohen ndjeshëm.

Shpesh, në histori, klasat sunduese vetëshkatërrohen, por asnjëherë në mënyrë të vetëdijshme dhe të qëllimshme.

Sigurisht, është e preferueshme (dhe më qetësuese) që fuqitë bërthamore të qeverisen nga një regjim politik i qëndrueshëm, me institucione solide, të vendosura mirë në shoqërinë e tyre. Sa më i qëndrueshëm të jetë një regjim, sa më e fortë të ndihet klasa e tij në pushtet, aq më pak do të tundohet (ose kështu supozohet) të veprojë jashtë kokës, të bëjë zgjedhje të pamatura dhe të rrezikshme. Autokracia kineze, për shembull, është e ndryshme nga ajo ruse. Kinezët, si Putini, gjithashtu kundërshtojnë rendin perëndimor dhe do të donin ta përmbysnin atë. Por ata mund të përballojnë të luajnë një “lojë të gjatë”. Ata do të preferonin, nëse munden (nëse i lejojmë), të gatuajnë në një zjarr të ngadaltë.

LEXO EDHE: “The Sun”: Putin u sabotua, provoi 2 herë të lëshojë raketa bërthamore

Putin përmend vazhdimisht armët bërthamore për një arsye të thjeshtë. Së bashku me shtrirjen territoriale të Rusisë, së bashku me mundësinë e mobilizimit të një numri të madh njerëzish në një luftë konvencionale, arsenali bërthamor është ai që e bën atë një fuqi të madhe. Gjë që nuk është aspak nga pikëpamja ekonomike. Është mbi të gjitha falë zotërimit të armëve bërthamore që Rusia, duke pretenduar statusin e një fuqie të madhe, pretendon të rindërtojë perandorinë e humbur me rënien e Bashkimit Sovjetik. Por fakti që Putini vazhdimisht tund “licencën” e tij si kreu i një fuqie bërthamore nën hundën tonë nuk e bën më pak të largët mundësinë që ai të kalojë nga fjalët në vepra. Sepse, me siguri, si ai dhe grupi i tij janë të interesuar të mbijetojnë.

Megjithatë, është e vërtetë se luftërat mund të shpërthejnë edhe nëse askush nuk i do. Kjo thjesht sepse vihen në lëvizje procese gjysmë-automatike që ne përfundojmë duke humbur kontrollin. Ky është rasti i Luftës së Parë Botërore. Kjo është pikërisht arsyeja pse ne duhet të shpresojmë se Putini do të ndalet në Ukrainë. Nëse do të fitonte, nuk do të ndalej. Pas një fitoreje, qoftë edhe të pjesshme, ndaj Kievit, do të sulmonte një vend tjetër evropian. Sepse kjo përkon me ideologjinë neo-perandorake nga e cila ai dhe grupi rreth tij nxjerrin legjitimitet. Dhe atëherë po, lufta e përgjithshme e kërkuar nga askush – sigurisht jo e dëshiruar nga perëndimorët – mundet përfundimisht të shpërthejë.

Putini na ka dhënë prova të shumta se si dobësia, ndjenja e pasigurisë së grupit qeverisës të një fuqie të madhe mund të gjenerojë agresion dhe aventurizëm. Dikush që ndihet i dobët në shtëpinë e tij mund të jetë shumë më i rrezikshëm se dikush që ndihet i fortë. Megjithatë, “Le të vdesë Samsoni me të gjithë filistinët” mbetet, edhe në këtë rast, një opsion i pamundur.

Ne kemi hyrë dhe do të mbetemi në një botë shumëpolare, të dominuar nga konkurrenca mes fuqive të mëdha. Ato janë të gjitha fuqi bërthamore. Lufta për supremaci ekonomike, politike dhe ushtarake është dhe do të jetë shumë intensive në të gjitha fushat e botës për një kohë të gjatë. Me tensione të vazhdueshme. Dhe, për fat të keq, mund të vëmë bast se do të ketë edhe shumë luftëra lokale në të ardhmen me përfshirjen e drejtpërdrejtë ose të tërthortë të fuqive të mëdha. Gjithmonë do të ketë nga ata që mendojnë “po sikur këtë herë të përfundojë vërtet keq?”. Askush nuk mund të garantojë asgjë. Megjithatë, ndoshta formula e Aronit (paqja e pamundur, luftë e pamundur) do të ruajë gjithashtu besueshmërinë e saj në të ardhmen. Të paktën, nëse po flasim për armët bërthamore. ©Nga Angelo Panebianco, analist politik italian. Corriere della Sera, Lapsi.al

The post Analiza/ A rrezikon tani bota një luftë bërthamore appeared first on Lapsi.al.

Kreu i Grupit parlamentarë të PD Gazment Bardhi, ka dalë nga SPAK-u, ku edhe ka mbajtur një deklaratë për mediat në lidhje me shantazhin që iu bë në telefon nga individë të caktuar, me qëllime kriminale për të shantazhuar një deputet të Kuvendit të Shqipërisë.

“Është e konfirmuar që ai format nuk është pjesë nga dosja e përgjimeve të SKY-ECC. Ka media që vazhdojnë edhe sot duke i paraqitur të dhënat në dy gjoja procesverbale. Në dijeninë time kjo ka ndodhur edhe me persona të tjerë. Kjo gjë ka të bëjë edhe me kredibilitetin e Prokurorisë së Posaçme duke poërdorur të dhëna që duhet të ishin sekrete”,- tha Bardhi.

“Përmbajtja e mesazheve të dërguara, sajimi i rrethanave dhe fakteve të pandodhura, ndërlidhja e emrit tim me individë krejtësisht të panjohur prej meje, synon frikësimin tim për të mos u përballur me fakte konkrete të paligjshmërisë, subjekte të posaçme apo eksponentë të krimit të organizuar, që janë nën hetim apo verifikim nga Prokuroria e Posaçme Kundër Krimit të Organizuar dhe Korrupsionit”, theksoi ai.

Kërkesa e plotë:

I nderuar Z. Drejtues i Prokurorisë,

Më datë 28 Shtator 2024, ora 20:22, në platformën e komunikimit tim “Signal”, në telefonin tim personal, nga një numër i paidentifikuar, me emër përdoruesi “Mbreti Zog”, janë dërguar disa mesazhe elektronike, dokumente qartazi të falsifikuara, emrat e dy shtetasve të përmendur në media si të përfshirë në krimin e organizuar, njëri prej të cilëve i shpallur në kërkim nga Prokuroria e Posaçme dhe një tjetër i mbetur i vrarë në një atentat në Tiranë, shoqëruar me “urimin” – “të jesh mirë”. Këtyre mesazheve i është vendosur nga dërguesi një kohëzgjatje fshirje prej 1 jave, me qëllim humbjen e mëpasme të tyre.

Duke vlerësuar përmbajtjen e këtyre mesazheve dhe dokumentit bashkëlidhur, që qartazi me sy të lirë dallohet se është i sajuar, çmoj të nevojshme t’ju informoj se për mua këto komunikime janë një tentativë për të më intimiduar në ushtrimin e detyrës time si deputet i Kuvendit të Shqipërisë dhe njëkohësisht Kryetar i Grupit Parlamentar të Partisë Demokratike, grupit parlamentar më të madh të opozitës në vend. Përmbajtja e mesazheve të dërguara, sajimi i rrethanave dhe fakteve të pandodhura, ndërlidhja e emrit tim me individë krejtësisht të panjohur prej meje, synon frikësimin tim për të mos përballur me fakte konkrete të paligjshmërisë subjekte të posaçme apo eksponentë të krimit të organizuar, që janë nën hetim apo verifikim nga Prokuroria e Posaçme Kundër Krimit të Organizuar dhe Korrupsionit.

Këto mesazhe intimiduese dhe me përmbajtje tërësisht të rreme vijnë pas seancës plenare të datës 12 Shtator 2024, ku gjatë një interpelance me Kryeministrin e Shqipërisë Edi Rama, unë në cilësinë e deputetit të Kuvendit të Shqipërisë e përballa atë me disa të dhëna të platformës SKY/ECC që janë bërë publike, si dhe e paralajmërova se shumë shpejt do ta përballë me të dhëna të tjera të të njëjtës natyrë që provojnë lidhjet mes funksionarëve të lartë publik dhe krimit të organizuar, gjithmonë pa cenuar dhe duke respektuar rregullat për ruajtjen e sekretit hetimor.

Ju jeni në dijeni të faktit se personalisht nga ana ime, apo në emër të Grupit Parlamentar të Partisë Demokratike, unë kam denoncuar pranë jush zyrtarë të lartë publik, familjarë të tyre, eksponentë të krimit të organizuar, apo lidhjet ndërmjet tyre. Kjo ngre dyshimin e arsyeshëm që pas tentativës për intimidimin tim apo dërgimit të këtyrë mesazheve, janë subjekte që hetohen nga Prokuroria që ju drejtoni (eksponentë të krimit të organizuar apo zyrtarë të lartë publikë).

Nga ana tjetër, përmes falsifikimit të një dokumenti që supozohet të jetë nën administrimin tuaj apo i atribuohet institucionit tuaj, qartazi synohet edhe diskretitimi i Prokurorisë që ju drejtoni, duke qëne se dokumente të kësaj natyre mund të gjenden vetëm në dosjet në hetimin nga ana juaj. Në këtë kuptim, verifikimi/hetimi i këtij rasti, është jo vetëm në interesin tim për të zbuluar autorët dhe motivet e tyre, por edhe për të ruajtur reputacionin dhe kredibilitetin e institucionit tuaj.

Përsa më lart, kërkoj bashkëpunimin tuaj për të hetuar dhe verifikuar në një kohë të shpejtë mesazhet me natyrë intimiduese ndaj një deputeti të Kuvendit të Shqipërisë, me qëllim identifikimin e autorit/ëve të këtyre mesazheve, motiveve të dërgimit të tyre, dhe arsyet e prodhimit të një dokumenti të falsifikuar. Gjithashtu, për qëllime publike ju nxis të verifikoni edhe përmbajtjen e rrethaneve konkrete të tyre.

Bashkëlidhur ju dërgoj përmbajtjen e mesazheve intimiduese, duke shprehur gadishmërinë time për tu vënë në dispozicionin tuaj menjëherë për verifikimin e plotë të rrethanave të këtij rasti, duke rikujtuar kohën e shkurtër që dërguesi ka vendosur (1 javë) për fshirjen e përmbajtjes së tyre.

Me respekt,

KRYETARI I GRUPIT PARLAMENTAR TË PARTISË DEMOKRATIKE

Gazment BARDHI

The post Shantazhet në telefon/ Bardhi flet nga SPAK: Persona me lidhje kriminale përdorin të dhëna të rreme appeared first on Lapsi.al.

Kuvendi iu drejtua me një shkresë Komisionit Qendror të Zgjedhjeve ku e njofton për vakancën e krijuar pas ndërprerjes së mandatit të deputetit për Ervin Salianjin.

Ish-deputetit të PD-së Salianji iu ndërpre mandati pas vendimit absurd të Gjykatës së Apelit që e dënoi me 1 vit heqje lirie.

Salianji mori mandatin e deputetit në zgjedhjet e 2021 në qarkun e Korçës.

Pas ndërprerjes së mandatit të deputetit, vendin e Salianjit e zë një prej emrave të listës shumëemërore të subjektit Partia Demokratike.

The post Burgosja e Salianjit, Kuvendi njofton KQZ për vakancën appeared first on Lapsi.al.

SPAK i sekuestroi telefonin, ministri Hoxha tregon përgjigjen e hetimeve për Prodën.

Ishte ministri i Brendshëm, Ervin Hoxha, ai i cili bëri publik lajmin në një deklaratë për media. Hoxha njoftoi gjithashtu se së shpejti do të nisin dhe konkurrset për sa i përket drejtuesve të policisë në nivel lokal.

“Kandidati i cili sot u emërua Drejtor i Përgjithshëm i Policisë, do të jetë në krye të Policisë së Shtetit. Menjëherë pas emërimit të tij si Drejtor i Përgjithshëm i Policisë së Shtetit do të vendosim konkurrimin e ri i cili do të hap një proces të ri për sa i përket të gjithë drejtuesve të policisë në qarqe”.

I pyetur nëse cënohet imzhi i drejtorit të ri të policisë së shtetit fakti që SPAK më herët i ka sekuestruar telefonin për të bërë verifikimin lidhur me dekonspirimin e operacionit për bandat e Elbasanit, ministri Hoxha u përgjigj.

“Fakti që të gjitha organet ligjzbatuese u pyetën në një kohë rekord dhe po ashtu përgjigjja e tyre erdhi në një kohë shumë të shpejtë, kandidaturat janë verifikuar nga çdo organ ligjzbatues dhe pastërtia e tyre ëhstë në përputhje të plotë me ligjin, ky proces konsiderohet transparent, integrues dhe drejtori i ri i përgjithshëk i policisë së shtetit i ka kaluar këto etapa verifikimi” tha Ministri i Brendshëm.

The post SPAK i sekuestroi telefonin, ministri Hoxha tregon përgjigjen e hetimeve për Prodën appeared first on Lapsi.al.

Koordinatori i rajonit të Tiranës, në PD, Klevis Balliu, gjatë një deklarate për mediat është shprehur se, skema e korrupsionit ‘5D’ e zbuluar në bashkinë e Tiranës, po përdoret dhe në bashkinë e Durrësit.

Balliu u shpreh se, ka qenë një kontroll i KLSH-së që ka zbuluar këtë skemë korruptive në bashkinë e Durrësit të drejtuar nga Emiriana Sako.

Deklarata e koordinatorit të rajonit të Tiranës, Klevis Balliu:

Skema 5D e Tiranës shtrihet edhe në Durrës.

Prokuroria e Durrësit ka arrestuar 5 punonjës të Bashkisë Rrogozhinë për abuzime me paratë e rindërtimit. Sipas prokurorisë, të arrestuarit kanë vjedhur paratë duke regjistruar stallat e derrave dhe kasollet e lopëve si banesa për t’u dëmshpërblyer.

Pse e theksojmë këtë fakt?

Po të bëni krahasime me bashkinë e Tiranës apo qeverinë qendrore, skema e ‘drejtësisë së rilindur’ është e njëjtë: akuzohen ose arrestohen drejtorët dhe lihen të lirë ideusit dhe përfituesit e skemës. Kështu edhe me rastin e Rrogozhinës, ndërkohë që pak kilometra më tej, në Bashkinë e dytë më të madhe në vend, atë të Durrësit, abuzimet dhe vjedhja me rindërtimin bën aq zhurmë sa beteja e dikurshme mes Cezarit dhe Pompeut në periferi të këtij qyteti.

Të dhënat e Kontrollit të Lartë të Shtetit, pagesat e thesarit dhe sistemi i prokurimeve, tregojnë se Bashkia e Durrësit lëvroi dhjetëra milionë euro për disa kompani gjysmë fiktive, pjesë e oborrit të favoreve të Sakos me kompani.

Kështu:

Më 3 shkurt 2022, Bashkia e Durrësit zhvilloi një tender të mbyllur me vlerë 2.1 milionë euro për rikonstruksionin dhe riparimin e mjediseve të përbashkëta në disa pallate në Rashbull. Fitues u shpall bashkimi i kompanive Rajli Ndërtim dhe G.P.G Company. KLSH thotë se dhënia e kontratës te dy kompanitë e mësipërme ishte në shkelje të ligjit për shkak se Rajli Ndërtim nuk plotësonte kriteret dhe kompanitë nuk kishin përcaktuar përqindjet në marrëveshjen e bashkëpunimit.

Sipas audituesve të KLSH, marrëveshja e ndarjes së punimeve mes dy kompanive në joint venture ka qenë fiktive dhe kjo nuk ishte e rastësishme. Sipas marrëveshjes, Rajli Ndërtim pretendonte se kishte 17.28 për qind të punimeve, ndërsa G.P.G Company 82.72 për qind. Por kjo ndarje ishte bërë pa preventiv çmimesh me qëllim që të mbulonte paaftësinë e Rajlit për të përmbushur kriteret e veçanta. Po kështu sipas KLSH, kjo kompani nuk plotësonte as numrin e kërkuar të punonjësve për të fituar tenderin dhe në këtë tregues dyshohet se ka falsifikuar letrat në bashkëpunim me bashkinë e Durrësit.

Por skema zbulohet e plotë te një fakt tjetër. Paratë e disbursuara nga Bashkia Durrës nuk janë ndarë 17.28 për qind tek Rajli dhe 82.72 për qind tek G.P.G sipas kontratës. Jo! 2 milion euro kanë shkuar të gjitha në llogarinë e Rajli Ndërtim, çka ngre dyshime se G.P.G ishte thjesht një mbulesë për të çuar paratë tek Rajli Ndërtim. Për çdo qokë ka një favor. G.P.G mori në këmbim një kontratë 4 milionë euro nga Emiriana Sako pak muaj më vonë.

Kush është kjo kompani e preferuar e Rilindjes në Durrës?

Rajli Ndërtim është një kompani që zotërohet nga dy aksionerë me bazë në Durrës. Në periudhën nga 1 janari 2019 deri në 31 dhjetor 2023, ajo ka realizuar një xhiro totale prej 8.5 milionë eurosh. Të gjitha kanë ardhur nga një burim i vetëm: Bashkia e Durrësit.

Pjesa dërrmuese kanë ardhur nga tendera me procedurë të mbyllur duke e përligjur këtë me gjendjen e jashtëzakonshme pas tërmetit. Nën ‘gjendjene jashtëzakonshme” Me të njëjtin justifikim, Rajli dhe GPG morën para dy muajsh edhe 4.5 milionë euro të tjera. G.P.G dhe Rajli kanë marrë 20 milionë euro nga Emirjana Sako. Të gjithë me tendera të mbyllur.

Rajli Ndërtim është një kompani nën ombrellën e drejtuesve lokalë të Partisë Socialiste dhe Bashkisë së Durrësit. Rajli është kopertura finciaro-kriminale për të pasuruar drejtuesit lokalë dhe për të vjedhur zgjedhjet. Rajli është 5D e Durrësit dhe prokuroritë lokale apo SPAK nuk mund të hetojnë kasollet e Rrogozhinës apo të Galigatit por masakrën me fondet e rindërtimit.

Çdo gjysme-hetim është hedhje hi syve dhe një tallje e madhe me paratë publike që paguajnë rrogat e larta dhe benefitet e shumta të SPAK.

The post Denoncimi/ Skema e kompanisë “5D” funksionoi edhe në Durrës appeared first on Lapsi.al.

Pas djegies së karrikeve në oborrin e parlamentit, kryesia e kuvendit ka paralajmëruar ndëshkime në radhët e opozitës.

Sekretariati i Etikës do të mblidhet për masa disiplinore ndaj 24 deputetëve të opozitës pas incidenteve gjatë seancës dhe djegies së karrigeve në oborrin e Parlamentit. Zakonisht këto masa ndëshkimore kanë të bëjnë me përjashtime që çojnë në humbjen e pagës.

Ndërkohë opozita proteston sepse një koleg i tyre, përveç rrogës dhe mandatit të deputetit ka humbur edhe lirinë e tij dhe sot është në burg.

“Ju njoftoj se me anë të shkresës nr. 3634 prot, datë 1.10.2024 të Grupit Parlamentar të Partisë Socialiste, është paraqitur kërkesa për marrje mase disiplinore ndaj 24 deputetëve:

Gazmend Bardhi, Flamur Noka, Bledion Nallbati, Edi Paloka, Saimir Korreshi, Lefter Geshtenja, Luan Baçi, Dashnor Sula, Agron Gjekmarkaj, Dhurata Çupi, Xhelal Mziu, Ina Zhupa, Zheni Gjergji, Helidon Bushati, Lindita Metaliaj, Ramadan Lika, Asllan Dogjani, Qani Xhafa, Flamur Hoxha, Isuf Çela, Kastriot Piroli, Lodovik Hasani, Kasem Mahmutaj, Edmond Spaho”, thuhet në njoftimin e kuvendit.

Njoftimi:

Të nderuar deputetë,

Bazuar në nenin 65/2 pika 2 të Rregullores së Kuvendit,

Ju njoftoj se me anë të shkresës nr. 3634 prot, datë 1.10.2024 të Grupit Parlamentar të Partisë Socialiste, është paraqitur kërkesa për marrje mase disiplinore ndaj 24 deputetëve:

Gazmend Bardhi, Flamur Noka, Bledion Nallbati, Edi Paloka, Saimir Korreshi, Lefter Geshtenja, Luan Baçi, Dashnor Sula, Agron Gjekmarkaj, Dhurata Çupi, Xhelal Mziu, Ina Zhupa, Zheni Gjergji, Helidon Bushati, Lindita Metaliaj, Ramadan Lika, Asllan Dogjani, Qani Xhafa, Flamur Hoxha, Isuf Çela, Kastriot Piroli, Lodovik Hasani, Kasem Mahmutaj, Edmond Spaho.

Ju njoftoj se Sekretariati për Procedurat, Votimet dhe Etikën do të mblidhet ditën e mërkurë, datë 2.10.2024, ora 15.00, për shqyrtimin e kësaj kërkese. Bashkëlidhur gjeni kërkesën për marrje mase disiplinore.

The post Protesta pas arrestimit të Salianjit/ Kuvendi paralajmëron ndëshkime appeared first on Lapsi.al.

Disa minuta pasi Flamur Noka dhe Blendi Nallbati ndezën në flakë karriget në oborrin e parlamentit, nga dera u pa të dilte me nxitim një gardist që mbante në dorë një fikëse zjarri. Me shpejtësi, para se ta ndalonin deputetët e opozitës, ai lëshoi shkumën nga fikësja e zjarrit dhe arriti t’i zbusë flakët e protestës. Disa minuta më pas, deputetët e opozitës u larguan dhe të tjerë gardistë u panë me fikëse zjarri dhe kova me ujë për të shuar flakët.

Pak a shumë, me të njëjtën detyrë që iu ishte ngarkuar gardistëve dhe që ata e ekzekutuan sipas parimit “urdhri nuk diskutohet, por zbatohet”, një ditë më pas u shfaqën edhe diplomatët e huaj të akredituar në Tiranë.

Me disa reagime publike ndërkombëtarët dolën kundër protestës se opozitës që dogji karriget e parlamentit dhe që ka lëshuar sinjale se do të tregojë forcën në 7 tetor përballë dhunës së mazhorancës.

Për ta bërë sa më skenike deklaratën, kreu i delegacionit të Bashkimit Europian, italiani Silvio Gonzato shkoi vetë në oborrin e parlamentit, pikërisht aty ku punonjësi i gardës kishte fikur flakët e karrigeve me kovën me ujë në dorë.

“Në një demokraci funksionale si Shqipëria pakënaqësitë duhet të shprehen në mënyrën e duhur e nuk duhet të përdoren dhunë apo dëmtime ndaj pronës për të shprehur mendimin, deputetët e kuvendit duhet të kenë mundësinë të përmbushin rolin e tyre në siguri të plotë” tha ambasadori i BE-së.

Në prononcimin e tij, Gonzato u bëri thirrje palëve t’i kthehen dialogut dhe që të ndalohet “përshkallëzimi i situatës dhe të shmangen sulmet personale dhe verbale”.

Pak më vonë, të njëjtin pozicion e mori edhe ambasada amerikane kur u shpreh shqetësimi për forcën e dhunën në Parlament ditën e djeshme, teksa apelohet për dialog mes palëve.

“Ambasada e SHBA është thellësisht e shqetësuar për shkatërrimin dhe forcën e shpalosur në parlamentin shqiptar të hënën. Akte të tilla dëmtuese dhe potencialisht lënduese nuk kanë vend në procesin demokratik”, thuhet ndër të tjera në reagim.

Shqetësimit për karriget e djegura në shenjë proteste të opozitës, iu shtua edhe ambasada britanike. Me një mesazh në rrjetet sociale, diplomatët britanikë kërkuan dialog konstruktiv dhe paqe në parlament.

“Dhuna nuk ka vend në demokraci. Ambasada britanike nxit të gjithë partitë politike në Shqipëri të përfshihen në dialog konstruktiv dhe në procese paqësore parlamentare. Ambasada britanike dënon aktivitetin që kërkon të minojë këto principe dhe mbetet e angazhuar të ndihmojë njerëzit dhe demokracinë në Shqipëri” thuhet në deklaratën e shkurtër për mediat.

Lexo edhe: Çfarë ua ka zënë sytë ambasadave që shohin vetëm karriket e djegura

Asnjë nga ambasadat nuk kishte reaguar më parë për burgosjen e Ervin Salianjit. Të mbetur peng të narrativës se reforma në drejtësi është një histori suksesi, diplomatët e huaj nuk kishin si të flisnin kur prokuroria dhe gjykatat e asaj që e quajnë drejtësia e re, ekzekutuan një hakmarrje të pastër politike, që pati si pikënisje denoncimin e trafikantëve të drogës.

Por duket se tashmë është tepër vonë. E njëjta opozitë ka përtypur arrestimin dhe izolimin e kreut të saj Berishës, ka parë arrestimin dhe burgosjen e një prej të paktëve kandidatëve fitues në zgjedhjet lokale Belerit dhe për më tepër po shikon se si përndiqet dhe kërcënohet me SPAK, sa herë tenton të ngrejë zërin për pakënaqësitë që ka ndaj qeverisjes së Edi Ramës.

Në konferencën me gazetarët, Sali Berisha nuk e pranoi kërkesën e ambasadave, por bëri dallimin mes burokratëve të diplomacisë dhe popujve që ata përfaqësojnë, të cilët heshtën pas arrestimit të Salianjit.

“PD ka respekt për partnerët ndërkombëtarë, por ka respekt edhe për popujt e vendeve partnere, të cilët sa herë gjenden përpara një padrejtësie, i japin përgjigjen e tyre të merituar cilitdo. Kjo është edhe përgjigjja ime. Në qoftë se unë vërtet në fjalën time kërkova që të mos heshtin para dhunës politike që është forma më e egër e dhunës, përpara burgosjes së një njeriu, i cili edhe njëherë, nuk mbrojti vetëm interesat e shqiptarëve, por edhe të qytetarëve të BE, për aq sa është Italia një vend kryesor i BE. Por, edhe për aq sa administrata e SHBA dhe vendeve të tjera është e interesuar për prerjen e lidhjeve të politikës me krimin dhe luftën kundër kriminalitetit” u shpreh Berisha. (konferenca e plotë KETU)

Njësoj edhe deputeti Tomorr Alizoti, në një prononcim vuri në dukje se reagimet e ambasadave kundër protestave nuk ndodhin në asnjë nga vendet e Bashkimit Europian.

“Me gjithë respektin, e bën ambasadori i BE këtë deklaratë kur digjet Athina apo Parisi? Jemi ne më të civilizuar se ata? Këtu është djegur liria e shqiptarëve. Opozita nuk duhet të merret me retorikë. Duhet të trembë pushtetin”, tha ai.

Alizoti u shpreh se opozita duhet të mbroje interesat e kombit dhe se dënimi i Salianjit ishte një padrejtësi për të cilën opozita duhet të mbushë rrugët.

“Të dënosh Salianjin e të lesh gjithë njerëzit që kanë harxhuar 500 mijë apo 1 milion dollarë, kjo është një çështje shqiptare. Shqiptarët duhet të mbushin rrugët. Demokracia dhe opozita duhet të radikalizohen. Le të fusin të gjithë deputetët e PD brenda, më mirë jemi atje. Sot Salianji është i madh dhe deputetët e PD të vegjël”, u shpreh Alizoti.

Pak kohë për të mos rënë dakort me ambasadat i është dashur edhe një grupimi tjetër të Partisë Demokratike, që pati dilema fillimisht për të ndjekur Berishën në opozitë kundër Ramës. Gazment Bardhi nuk ngurroi t’u jepte përgjigje diplomatëve të BE dhe të SHBA duke kundërshtuar fjalë për fjalë deklaratat e tyre.

“Nuk ka akt më antidemokratik sesa tentativa për të zhbërë opozitën. Nuk ka akt më brutal dhe të dhunshëm sesa të burgosesh për fjalën e lirë. Nuk ka autoritarizëm më të madh sesa të injorosh vendimet e Gjykatës Kushtetuese dhe të refuzosh të dorëzosh para drejtësisë një deputet të mazhorancës.

Nuk ka veprim më të dhunshëm sesa të marrësh hapur autorësinë e vendimeve politike të gjykatave që burgosin opozitën dhe të kërcënosh me fjalor rruge këdo që guxon të denoncojë lidhjet e Edi Ramës me krimin e organizuar” shprehet ai ndër të tjera në një status në rrjetet sociale.

Kundërshtimi në bllok ndaj qëndrimit që mbajtën ambasada e SHBA dhe delegacioni i BE për protestën e opozitës është shenjë e një faze tjetër të ndërgjegjësimit, atë që nëse ka realisht përballje me Ramën, s’mund të ketë flirt me ata që e ndihmojnë të qëndrojë në pushtet, dhe këta nuk janë vetëm diplomatë të huaj./Lapsi.al

The post Deklaratat pas protestës/ Diplomatët, si gardisti që fiku zjarrin e karrigeve appeared first on Lapsi.al.

Kryetari i Grupit Parlamentar të PD, Gazment Bardhi ka reaguar pas deklaratave të ambasadorit të BE në Tiranë, Silvio Gonzato dhe ambasadës së SHBA, lidhur me protestën në Kuvend. Bardhi thotë në reagimin e tij se mazhoranca po vepron si gjykatë duke burgosur opozitën si dhe kërcënon deputetët që denoncojnë lidhjet e qeverisë me krimin.

Reagimi

Nuk ka akt më antidemokratik sesa tentativa për të zhbërë opozitën. Nuk ka akt më brutal dhe të dhunshëm sesa të burgosesh për fjalën e lirë. Nuk ka autoritarizëm më të madh sesa të injorosh vendimet e Gjykatës Kushtetuese dhe të refuzosh të dorëzosh para drejtësisë një deputet të mazhorancës. Nuk ka veprim më të dhunshëm sesa të marrësh hapur autorësinë e vendimeve politike të gjykatave që burgosin opozitën dhe të kërcënosh me fjalor rruge këdo që guxon të denoncojë lidhjet e Edi Ramës me krimin e organizuar.

Grupi Parlamentar i Partisë Demokratike dhe çdo qytetar i ndershëm në këtë vend, është thellësisht i shqetësuar për shkatërrimin e balancës mes pushtetetëve, asgjesimit të parimeve demokratike, shantazhit dhe dhunës ndaj opozitës e qytetarëve, rikthimit të metodave të Sigurimit të Shtetit për përndjekjen kundër opozitës dhe qytetarëve, apo ngritjes në majat e pushtetit të krimit të organizuar.

Dialogu është mjet i duhur në vende demokratike, ku mosmarrëveshjet zgjidhen në rrugë institucionale. Por një vend, ku shumica në Parlament injoron vendimet e Gjykatës Kushtetuese kur ato janë në favor të opozitës, nuk është as demokratik dhe as krijon mundësinë për ndjekjen e rrugëve institucionale. Nga protesta apo aktet simbolike nuk i rrezikohet jeta askujt, përveçse rrezikohet pushteti personal i Edi Ramës! Nga përballja me krimin e organizuar dhe qeverisjen e kriminalizuar të lidhur me të, që është mision i çdo deputeti që mbron interesin publik, i rrezikohet jeta e prona kujtdo, çdo sekond, çdo minutë, çdo orë dhe çdo ditë.

Për këtë arsye, reagimi, rezistenca dhe mosnënshtrimi është e vetmja formë që i mbetet opozitës për të mbrojtur demokracinë dhe shtetin ligjor. Me keqardhje rikonfirmoj se e kemi të pamundur t’i nënshtrohemi dhunës së Edi Ramës, të lejojmë asgjesimin e çdo grimce lirie në këtë vend apo të pranojmë në heshtje instalimin e shtetit të tij personal.

The post Reagimi për ambasadat/ Gazment Bardhi: Nuk ka akt më brutal se të burgosësh fjalën e lirë! appeared first on Lapsi.al.

Kryetari i PD-së Sali Berisha ka reaguar lidhur me qëndrimet e diplomatëve të akredituar në Tiranë, të cilët janë shprehur të shqetësuar lidhur me djegien e karrigeve nga deputetët demokratë, në hyrjen e parlamentit, gjatë pasdites së të hënës.

Ambasadori i BE-së në Tiranë dhe më pas Ambasada e SHBA kanë kërkuar nga palët që të ulen të dialogojnë, ndërsa theksojnë se akte të tilla dëmtuese dhe potencialisht lënduese nuk kanë vend në procesin demokratik.

Por Berisha në reagimin e tij solli në vëmendje reagimet që bëjnë popujt e vendeve partnere të Shqipërisë, kur u cënohen të drejtat.

“PD ka respekt për partnerët ndërkombëtarë, por ka respekt edhe për popujt e vendeve partnere, të cilët sa herë gjenden përpara një padrejtësie, i japin përgjigjen e tyre të merituar cilitdo. Kjo është edhe përgjigjja ime.

Në qoftë se unë vërtet në fjalën time kërkova që të mos heshtin para dhunës politike që është forma më e egër e dhunës, përpara burgosjes së një njeriu, i cili edhe njëherë, nuk mbrojti vetëm interesat e shqiptarëve, por edhe të qytetarëve të BE, për aq sa është Italia një vend kryesor i BE.

Por, edhe për aq sa administrata e SHBA dhe vendeve të tjera është e interesuar për prerjen e lidhjeve të politikës me krimin dhe luftën kundër kriminalitetit. Natyrisht unë jam i vetëdijshëm për fuqinë e jashtëzakonshme korruptive, siç është faktuar, të kreut të narkoshtetit. Por prapë, interesat nuk mund t’i korruptojnë.

Thirrja ime kishte të bënte me interesat e përbashkëta, me vlerat e përbashkëta që ne ndajmë me partnerët. Por secili përcakton qëndrimin e tij”, tha Berisha.

The post Berisha-diplomatëve: Popujt tuaj kur gjenden para një padrejtësie, i japin përgjigjen e merituar cilitdo! appeared first on Lapsi.al.

Sekretari i Përgjithshëm i Partisë Demokratike, Flamur Noka ka thënë se arrestimi dhe burgosja e Ervin Salianjit ishte hakmarre politike për faktin se ai denoncoi vëllain e Fatmir Xhafajt traifkant droge që më pas u detyrua të bëjë burg në Itali. Sipas Nokës, Fatmir Xhafaj ishte betuar në varrin e nënës së tij që një ditë do të burgoste Salianjin që i çoi vëllain në burg.

“Ka dhe një gjë të tmerrshme, e dini pse se ai (Xhafaj) e ka mbushur dynjanë që jam betuar tek varri i nënës që do ta burgos. Nuk duhet të sulmohet ai që të shërben, por ai që denoncon” u shpreh Noka për Top Channel..

Më herët edhe Salianji ka mbështetur të njëjtin version sipas të cilit Fatmir Xhafaj kishte thënë se do ta çonte në burg si kompensim për burgun që bëri vëllai i tij Agron Xhafaj.

Gjykata e dënoi Ervin Salianjin me 1 vit burg për denoncimin që bëri bashkë me Albert Veliun dhe gazetarin Jetmir Olldashi. Sipas vendimit Salianji bëri një kallëzim publik, duke denoncuar vëllezërit Xhafaj nga selia e Partisë Demokratike.

The post Flamur Noka: Fatmir Xhafaj u betua tek varri i nënës që do ta burgos Salianjin! appeared first on Lapsi.al.

Pas protestës së opozitës në parlament ku u dogjën disa karrige, ka reaguar ambasada amerikane që shprehet e shqetësuar për shkatërrimin që ndodhi në parlament. Sipas ambasadës, akte të tilla “dëmtuese” dhe “lënduese” nuk kanë vend në një proces demokratik.

Reagimi është në sinkron me atë të ambasadorit të Bashkimit Europian që ka bërë thirrje për vetëpërmbajtje dhe qortoi opozitën për aksionin që zhvilloi në parlament.

Megjithatë, duhet thënë se asnjë nga ambasadat nuk pati asnjë reagim për burgosjen e Ervin Salianjit për “kallëzim publik” një akuzë që nuk ekziston në kodin penal dhe që erdhi pas denoncimit që i bëri ai vëllait trafikant të ministrit të brendshëm. Deri tani nga radhët e opozitës ka pasur vetëm një reagim për ambasadorët, ai i Tomorr Alizotit që pyeti nëse ambasadat reagojnë në Greqi apo në Itali, njësoj siç bëjnë në vendin tonë kur ka protesta.

Reagimi i plotë i ambasadës amerikane

Ambasada e SHBA është thellësisht e shqetësuar për shkatërrimin dhe forcën e shpalosur në parlamentin shqiptar të hënën. Akte të tilla dëmtuese dhe potencialisht lënduese nuk kanë vend në procesin demokratik. Nxisim të gjitha palët e përfshira të ushtrojnë vetëpërmbajtje, të angazhohen në dialog konstruktiv si dhe të përqafojnë vlerat e respektit dhe qytetarisë. Mbështesim diskutimet paqësore dhe bashkëpunuese lidhur me negociatat për anëtarësimin e Shqipërisë në BE si dhe do të vazhdojmë të qëndrojmë krah institucioneve shqiptare teksa punojnë për ta sjellë Shqipërinë më pranë bashkësisë euro-atlantike.

The post Ambasada amerikane e shqetësuar për karriget e djegura të parlamentit appeared first on Lapsi.al.

Tomor Alizoti ka reaguar pas komenteve të ambasadorit të BE në vendin tonë, Silvio Gonzato, i cili tha se dhuna dhe pamjet e djeshme nuk janë normale dhe se dhuna nuk është zgjidhje.

Deputeti demokrat deklaroi se opozita duhet të radikalizohet për të trembur pushtetin, pasi është djegur liria e shqiptarëve.

“Me gjithë respektin, e bën ambasadori i BE këtë deklaratë kur digjet Athina apo Parisi? Jemi ne më të civilizuar se ata? Këtu është djegur liria e shqiptarëve. Opozita nuk duhet të merret me retorikë. Duhet të trembë pushtetin”, u shpreh ai.

Alizoti u shpreh ndër të tjera se opozita duhet të mbroje interesat e kombit shqiptar. “Nesër mund të hyjë kushdo në burg, edhe ju”, tha ai.

“Pse nuk ka një gjyq ndaj njerëzve në pushtet, por ndaj atyre që e humbin pushtetin. Të dënosh Salianjin e të lesh gjithë njerëzit që kanë harxhuar 500 mijë apo 1 milion dollarë, kjo është një çështje shqiptare.

Shqiptarët duhet të mbushin rrugët. Demokracia dhe opozita duhet të radikalizohen. Le të fusin të gjithë deputetët e PD brenda, më mirë jemi atje. Sot Salianji është i madh dhe deputetët e PD të vegjël”, u shpreh ai.

The post Tomorr Alizoti: A flet ambasadori i BE kur digjet Athina apo Parisi? appeared first on Lapsi.al.

Ervin Salianji ka reaguar pasi Kuvendi i ndërpreu mandatin e deputetit dhe i kërkoi KQZ-së vijimin e procedurave për të zëvendësuar deputeti demokrat.

Përmes një postimi në rrjetet sociale, Salianji shkruan se mandati iu hoq me urdhër të kryeministrit Edi Rama. Ai shkruan se edhe nga burgu do të jetë tmerri i mazhorancës, ndërsa shton se izolimi nuk do ta ndalë atë.

Reagimi

Sot me vendimin politik të Edi Ramës, socialistët vendosin ta fshijnë emrin tim nga rradhët e opozitës në Parlament, duke hequr mandatin e dhënë nga qytetarët e Korçës! Jam krenar që në çdo ditë të ekzistencës time politike i kam shërbyer vetëm interesit të qytetarëve! Edhe nga burgu politik do të vazhdoj të jem tmerri i atyre që mendojnë se me izolimin tim do të më mbyllin gojën. Asgjë nuk më ndal! Beteja politike vazhdon!

The post Kuvendi i hoqi mandatin, reagon nga burgu Ervin Salianji appeared first on Lapsi.al.

Kush pret që mazhoranca të sillet me takt ndaj opozitës, meqë protesta ka në thelb burgosjen e një deputeti, do të zhgënjehet. Pas protestës së opozitës sot në parlament, mazhoranca vijoi me masat ndëshkuese. Menjëherë pasi deputetët i vunë flakën karrigeve, është përjashtuar në vend Flamur Noka, ndërsa seanca është mbyllur me një kërcënim nga Elisa Spiropali.

“Ju kujtoj deputetë që të gjitha aktet tuaja kanë pasoja dhe sipas rregullores edhe do të shqyrtohen” tha ajo në fund të seancës duke paralajmëruar ndëshkime të tjera. Opozita ka paralajmëruar një protestë të hënën në 7 tetor, ndërsa duket se mazhoranca do t’i përgjigjet flakë për flakë.

The post Protesta për Salianjin/ Mbyllet seanca parlamentare me një kërcënim për opozitën appeared first on Lapsi.al.

Ky është momenti kur deputetët e opozitës i kanë vënë flakën karrigeve në oborrin e parlamentit, pas seancës kur u ndërpre mandati i deputetit Ervin Salianji. Kreu i grupit parlamentar, Gaz Bardhi tha se Salianji është në burg sepse denoncoi lidhjet e krimit me pushtetin dhe se është Edi Rama që i ka vënë flakën parlamentit me dënimin e Salianjit.

“Ne po djegim karriget tona. Ne nuk jemi këtu për karriget tona. Jemi këtu për të mbrojtur interesin publik. Salianji denoncoi lidhjet e Fatmir Xhafajt me krimin. Karriget tona janë të qytetarëve. Edi Rama ka djegur parlamentin”

Pas fjalës së Bardhit dhe tensioneve në parlament, nga parlamenti u dha 10 minuta pushim, për qetësimin e situatës.

 

The post VIDEO/ Karriget e djegura të deputetëve të opozitës në oborrin e kuvendit appeared first on Lapsi.al.

Opozita e ka lënë bosh gjysmën e sallë së parlamentit, duke hequr karriget dhe duke i thyer jashtë në oborr. Më pas, deputetët e opozitës kanë braktisur sallën dhe kanë dalë jashtë, ndërsa kryetarja e parlamentit, Elisa Spiropali njoftoi ndërprerjen e mandatit të Ervin Salianjit për shkak të vendimit të gjykatës së Apelit. Pasi kanë nxjerrë jashtë karrigeve i është vënë flaka në oborrin e parlamentit.

The post Arrestimi i Salianjit/ Flakë në parlament, deputetët i vënë zjarrin karrigeve appeared first on Lapsi.al.

Shefi i diplomacisë në Serbi, Marko Gjuriq, tha se janë të gatshëm të bashkëpunojnë me Shtetet e Bashkuara të Amerikës për hetimet e investimeve të planifikuara në Beograd të Jared Kushnerit, dhëndrit të ish-presidentit amerikan, Donald Trump.

Në një intervistë për Zërin e Amerikës, Gjuriq u përgjigj negativisht në pyetjen nëse ai, gjatë kohës kur ishte ambasador në Uashington, kishte njohuri për hetimin që Komisioni i Financave i Senatit të Kongresit Amerikan po zhvillon mbi veprimtarinë e kompanisë së dhëndrit të ish-presidentit të SHBA-së, Donald Trump.

Ndërsa Shqipëria, ku Kushner po ashtu ka planifikuar investime, deri më tani nuk ka reaguar ndaj një hetimi që ka nisur Komiteti për Financa i Senatit të SHBA-së lidhur me to.

Investimet potenciale në Shqipëri dhe në Serbi të firmës Affinity, në pronësi të Kushnerit, janë bërë pjesë e një hetimi që ka nisur senatori amerikan, Ron Wyden, mbi ndikimet e mundshme politike të qeverive të huaja në familjen Trump.

Wyden, kryesues i Komitetit për Financa në Senatin amerikan, më 24 shtator i ka nisur një letër zyrtare kompanisë së Kushnerit, Affinity Partners, nëpërmjet së cilës ka kërkuar informacione në lidhje me këto investime.

Në këtë letër, ai ngre dyshime mbi detajet e investimeve potenciale në dy shtetet dhe nëse kjo u jep qeverive të huaja “kontroll potencial me mundësi detyrimi mbi investimet e familjes së presidentit të mundshëm të ardhshëm të SHBA-së”.

Donald Trump, tashmë është i nominuari i republikanëve për president të SHBA-së në zgjedhjet e nëntorit.

Në administratën e kaluar të Trumpit, Kushner kishte rolin e këshilltarit të lartë të presidentit.

Komiteti për Financa në senatin amerikan merret me çështje që lidhen me taksat dhe të ardhurat në përgjithësi, dhe ka autoritetin të hetojë, rishikojë dhe vlerësojë ligjet ekzistuese dhe agjencitë që i zbatojnë ato.

Për çfarë investimesh bëhet fjalë?

Kushner, i cili themeloi kompaninë e tij më 2021, bëri publike në mars të këtij viti, planet për investime në Shqipëri dhe në Serbi, të dyja të parapara në vlerë prej mbi 1 miliard dollarësh.

Derisa në Serbi planet janë konkretizuar me marrëveshje qeveritare me firmën e tij, në Shqipëri ato kanë mbetur ende “një shprehje interesi” për investim.

Letra e re e senatorit është vazhdimësi e një hetimi të nisur në qershor.

Ndër të tjera, senatori ngre dyshime për faktin se, siç thuhet, firma e Kushnerit është e financuar krejtësisht nga investitorë të huaj dhe atë në shumicë nga një fond i Qeverisë së Arabisë Saudite, derisa fonde të tjera përfshijnë ato nga qeveritë e Katarit dhe Emirateve të Bashkuara Arabe ndër tjera.

Sipas letrës, këto fonde paguhen gradualisht dhe parashihet të arrijnë vlerën totale prej 3 miliardë dollarësh deri në vitin 2026.

Megjithatë, senatori shton se kompania e Kushnerit ende “nuk ka gjeneruar ndonjë fitim për investitorët e tij”.

Në letrën e tij, kryesuesi i Komitetit shpreh edhe shqetësim për nivelin e ndikimit që këto qeveri të huaja mund të kenë mbi familjen e kandidatit për president të SHBA-së, Donald Trump, nëse ai zgjidhet sërish president.

“Kjo krijon një situatë ku qeveritë e Arabisë Saudite, Katarit dhe Emirateve të Bashkuara Arabe do të kenë ndikim të rëndësishëm mbi familjen Trump nëse kërcënojnë t’i tërheqin investimet e tyre dhe të ndalojnë pagesën e miliona dollarëve në tarifa ndaj Kushnerit dhe njëkohësisht, vajzës së Trumpit, Ivanka Trump”, thuhet në letër.

Me qëllim të hetimit të mëtejmë, senatori i ka kërkuar kompanisë Affinity të dhëna të detajuara mbi fondet dhe planet investuese dhe për këto pyetje ka kërkuar përgjigje deri më 9 tetor.

Radio Evropa e Lirë deri më tani nuk ka arritur të marrë një koment nga kompania Kushner lidhur me këtë çështje.

Në një deklaratë për New York Times, Affinity e quajti letrën e Wydenit një veprim politik, duke shtuar se firma kishte ndjekur të gjitha ligjet federale dhe rregullat etike.

Investimet në Shqipëri dhe shqetësimet e senatorit

Në mars, Kushner postoi disa fotografi në rrjete sociale për dizajnet potenciale të investimeve të firmës së tij në Shqipëri.

Ai kishte thënë se synon ta shndërrojë ishullin më të madh të Shqipërisë, Sazan, në Detin Mesdhe, në një destinacion luksoz për turistët.

Ky ishull kryesisht i braktisur, aktualisht është bazë ushtarake dhe është gjysmë i hapur për publikun.

Kushner, gjithashtu, kishte thënë se synon t’i ndërtojë disa hotele dhe qindra vila në Zvërnec, një zonë bregdetare në Vlorë, në jug të Shqipërisë.

Deri më tani, sipas autoriteteve të Shqipërisë, kompania ka shprehur interes zyrtar për të qenë investitor potencial në Sazan dhe do t’i nënshtrohet procesit të vlerësimit.

Në të kaluarën, sa i përket Zvërnecit, Qeveria kishte thënë se zyrtarisht nuk ka pranuar ndonjë shprehje interesi lidhur me këtë investim.

Planet e Kushnerit u përballën me kundërshtime në Shqipëri, sidomos nga ambientalistët që thonë se mund të shkaktohen dëme në zonat e mbrojtura bregdetare.

Në anën tjetër, kryeministri i Shqipërisë, Edi Rama, më 19 mars, kishte thënë se “do të negociohet pjesëmarrja e shtetit në investimin e planifikuar të Jared Kushnerit në ishullin e Sazanit”.

Rama kishte shtuar se për investimet në ishullin Sazan, Qeveria e drejtuar prej tij “nuk zgjedh persona, por në bazë të legjislacionit shqiptar u referohemi ofertave dhe propozimeve që na bëhen”.

Në anën tjetër, në letrën e fundit të Wydenit, thuhet se “Affinity i tregoi Komitetit se Qeveria serbe dhe ajo shqiptare fillimisht iu afrua individëve të lidhur me kompaninë Affinity në lidhje me një investim për projektet potenciale”.

Kështu, senatori ka kërkuar që kompania të tregojë se kush saktësisht i është afruar kompanisë për të diskutuar për plane të mundshme investimi.

Ministria e Jashtme e Shqipërisë deri më tani nuk u është përgjigjur pyetjeve të REL-it lidhur me këtë çështje.

“Investimet në Serbi, rrezik për rishkrim të historisë”

Shqetësimet e njëjta me investimet në Shqipëri, senatori i shprehu edhe për ato në Serbi, përveçse te kjo e fundit, Wyden thotë se mund të çojë edhe në rishkrim të historisë në kontekst “antiamerikan”.

Më 15 maj, Serbia e nënshkroi një marrëveshje për rivitalizimin e kompleksit të ish-Sekretariatit Federal për Mbrojtjen Kombëtare me kompaninë Affinity të Kushnerit.

Kompania e Kushnerit planifikon të ndërtojë një kompleks biznesi-banesor në vendin e ish-Shtabit të Përgjithshëm në Beograd.

Ndërtesa e Shtabit të Përgjithshëm ishte bombarduar natën mes 29 dhe 30 prillit dhe më 7 e 8 maj 1999, nga forcat e NATO-s.

NATO-ja filloi bombardimin e ish-Jugosllavisë më 24 mars të atij viti si përgjigje ndaj persekutimit të shqiptarëve në Kosovë nga forcat serbe të sigurisë.

Ndërkohë, ministri i Ndërtimit, Transportit dhe Infrastrukturës në Qeverinë e Serbisë, Goran Veshiq, tha në maj se investitori (Affinity) ka për obligim që në të njëjtën parcelë të ndërtojë një kompleks memorial kushtuar të gjitha viktimave të bombardimeve të NATO-s.

Pikërisht këtë pikë, Wyden e ka parë si problematike pasi thotë se monumenti u përshkrua si i dedikuar për “viktimat e agresionit të NATO-s”.

“Është krejtësisht e papërshtatshme që një qeveri e huaj t’i kërkojë një kompanie amerikane të marrë pjesë në atë lloj revizionizmi historik antiamerikan, një akt që mbulon spastrimin etnik dhe gjenocidin dhe e përshkruan në mënyrë të rreme NATO-n si një antagoniste, dhe është skandaloze që një firmë e themeluar dhe pronë e familjes së një ish-presidenti dhe presidenti të mundshëm të ardhshëm, të Shteteve të Bashkuara, do të pajtohej me këtë”, thuhet në letër.

REL-i i është drejtuar me pyetje edhe Ministrisë së Punëve të Jashtme të Serbisë lidhur me këtë çështje, por deri më tani nuk ka marrë përgjigje./ Doruntina Baliu për Radio Evropa e Lirë 

The post Pse po hetohen investimet e Kushnerit në Shqipëri e Serbi? appeared first on Lapsi.al.