Dashi

Jeta juaj ne çift do jete gjate gjithë ditës e mbrojtur sot. Nuk do keni asnjë debat me partnerin tuaj, përkundrazi do dashuroheni ne mënyrë pasionante me te. Beqaret do jene te paduruar dhe mund te bëjnë gabime. Ata qe do dine te durojnë do jene me te fituarit. Ne planin financiar do kryeni transaksionet e menduara prej kohesh sepse situata do jete goxha e qëndrueshme.

Demi

Zjarri i dashurisë do qëndrojë i ndezur edhe gjate kësaj dite. Do ja kaloni mjaft mire pranë te dashurit te zemrës suaj. Beqaret duhet te tregohen sa me te matur qe te mundin dhe te mos ju besojnë te gjitha fjalëve te bukura qe do ju thonë. Ne planin financiar do jete Marsi ai qe do ju mbështesë dhe do ju beje te jeni me te qarte për gjendjen ekzistuese.

Binjaket

Nëse e lini pas dore partnerin tuaj sot ka rrezik qe ai t’ju rrëshqasë nga duart. Kujdesuni me tepër për te dhe mos ngurroni ne çdo moment ta surprizoni. Beqaret nuk do rreshtin se kërkuari dashurinë, por nuk do ja dalin dot mbanë as sot. Me financat nuk do i keni punët shume mire. Duhet t’i menaxhoni me kujdes ato nëse nuk doni te mbeteni pa para.

Gaforrja

Dite shume e qete dhe pa asgjë te veçante kjo e sotmja për te dashuruarit. Nuk do përjetoni as emocione te jashtëzakonshme, por fatmirësisht nuk do keni as debate. Beqaret duhet t’ia lënë gjithçka ne dore yjeve. Ata do kujdesen qe gjithçka te shkoje me se miri. Financat fatmirësisht do jene me te mira se disa dite me pare. Mund te shpenzoni për gjerat me te nevojshme.

Luani

Do jeni shume te shqetësuar gjate kësaj dite për mbarëvajtjen e jetës suaj ne çift. Nuk do ndiheni aspak mire dhe here pas here do konfliktoheni me partnerin. Beqaret do e kenë me te lehte ta bëjnë për vete personin qe pëlqejnë. Ata e dine mire mënyrën qe duhet te përdorin. Ne planin financiar duhet ta shtrëngoni paksa rripin qe te mos keni vështirësi.

Virgjeresha

Dashuria do jete me e privilegjuar se kurrë gjate kësaj dite. Do i kushtoni kohen dhe vëmendjen e duhur personin qe keni ne krah. Beqaret do kenë takime mbresëlënëse te cilat do ua ndryshojnë jetën përgjithmonë. Saturni do ndikoje pozitivisht tek financat tuaja. Do jeni me te organizuar dhe ne asnjë mënyrë nuk do shpenzoni kuturu.

Peshorja

Do debatoni kot se koti me atë qe keni ne krah sot dhe kjo do e përkeqësoje klimën ne jetën tuaj ne çift. Asgjë nuk do shkoje ashtu si ju e kishit menduar deri me sot. Beqaret do kenë mundësi te zgjedhin personin e duhur për te filluar një jete te re mjaft emocionuese. Ne planin financiar edhe pse situata nuk do jete problematike, nuk rekomandohet te luani me zjarrin.

Akrepi

Edhe ata qe janë ne një lidhje do jene te interesuar për aventura kalimtare sot. Ata do ju japin me tepër rëndësi emocioneve te momentit, por ne fakt shume shpejt do pendohen. Beqaret do joshin dhe do joshen pa fund. Mundësitë për te krijuar një lidhje te bukur do jene te shumta. Ne planin financiar duhet te tregoheni sa me te arsyeshëm qe te mos keni probleme.

Shigjetari

Do jeni shume sensuale sot dhe do e bëni edhe partnerin te ndihet me se miri. Ne mbrëmje do organizoni edhe një darke romantike, me qirinj dhe me muzike te përshtatshme për ambientin. Beqaret nuk do jene ende gati te fillojnë një lidhje te qëndrueshme. Ne planin financiar situata do vazhdoje te jete e njëjtë. Duhet te shpenzoni me shume kujdes.

Bricjapi

Do ketë shume probleme gjate kësaj dite ne jetën tuaj ne çift dhe atmosfera do jete goxha e turbullt. E mira do jete te qëndroni pak larg partnerit dhe te reflektoni me kujdes. Beqaret do e gjejnë papritur shpirtin e tyre binjak. Me ne fund do ndihen te plotësuar. Financat nuk do jene te këqija. Me mire mbajini aq sa keni sesa te ndërmerrni rreziqe te mëdha për t’i përmirësuar shpejt.

Ujori

Ata qe janë ne një lidhje do kenë disa vështirësi te vogla me personat qe kane ne krah. Mundohuni te bëni lëshime dhe te toleroni nëse nuk doni probleme serioze. Beqaret nuk do jene edhe për shume kohe ne këtë gjendje. Sot do ndodhe një takim i mrekullueshëm i cili mund t’ua ndryshoje rrjedhën e jetës. Financat do jene me te mira se disa kohe me pare.

Peshqit

Do tregoheni shume autoritare gjate kësaj dite ne jetën tuaj ne çift dhe kjo do krijoje here pas here debate me personin qe keni ne krah. Mundohuni te ndryshoni sjellje nëse nuk doni probleme serioze. Beqaret do e ndiejnë me shume se kurrë peshën e vetmisë. Ne planin financiar do e dini mire çfarë te bëni qe situata te normalizohet. Do jeni me te qete ne këtë sektor.

The post Horoskopi për ditën e nesërme, ja çfarë parashikojnë yjet appeared first on Sot News | Lajme.

1 vit e gjysmë pasi u emërua në krye të kompanisë publike të prodhimit të pasaportave biometrike dhe kartave të identitetit, IdentiTek, largohet nga kjo detyrë Loina Prifti.

Nuk dihen arsyet e largimit, por ministri i Brendshëm Ervin Hoxha të mërkurën pritet të firmos zëvendësuesen e saj, sërish një grua.

Burime bëjnë me dije se vendin e Priftit e zë Freskida Halilaj, e cila vjen nga një eksperiencë e gjatë në telekomunikacion.

The post Largohet nga drejtimi i ‘IdentiTek’ Loina Prifti, ja kush do e zëvendësojë, Ministri Hoxha firmos nesër për pasuesen appeared first on Sot News | Lajme.

A e keni menduar ndonjëherë se sa i rëndësishëm është shëndeti i zorrëve për mirëqenien tuaj të përgjithshme? Zorrët nuk janë vetëm një organ që përpunon ushqimin. Në thelb është “mendja” juaj e dytë dhe nëse po pyesni se cilat ushqime mund t’ju japin një shtysë dhe promovojnë shëndetin tuaj ushqyes, është koha për të zbuluar superushqimet që do të ushqejnë zorrët tuaja.

Pra, le të shohim se cilat janë opsionet më të mira që mund të shtoni në pjatën tuaj për ta mbajtur zorrën tuaj të lumtur dhe të shëndetshme!

1. Frutat dhe perimet

Le të fillojmë me klasikët: frutat dhe perimet! Ato janë të pasura me fibra bimore, të cilat janë thelbësore për funksionimin e mirë të zorrëve. Disa nga frutat më të mira për t’u provuar janë mollët, bananet, dardhat dhe luleshtrydhet. Sa për perimet, brokoli, karotat dhe spinaqi janë zgjedhje të shkëlqyera!

2. Ushqimet probiotike

Probiotikët janë mikroorganizmat “të mirë” që ndihmojnë në balancimin e mikrobiomës së zorrëve. Për t’i marrë ato, mund të konsumoni kos, kefir dhe ushqime të fermentuara si kimchi dhe lakër turshi. Këto ushqime jo vetëm që përmirësojnë shëndetin e zorrëve, por gjithashtu ndihmojnë në tretje.

3. Drithërat integrale

Nëse jeni adhurues i bukës dhe drithërave, atëherë opsionet e grurit integral janë për ju! Buka e grurit integral, tërshëra dhe orizi kaf përmbajnë më shumë fibra sesa produktet e përpunuara. Kjo do të thotë tretje më e mirë dhe më pak mundësi për probleme si kapsllëku.

4. Arra dhe fara

Janë të pasura me lëndë ushqyese dhe yndyrna të mira. Mos harroni arrat si arrat dhe bajamet, si dhe farat chia dhe farat e lirit. Janë shumë ushqyese dhe i sigurojnë trupit tuaj lëndët ushqyese të nevojshme.

5. Burimet bimore të proteinave

Burimet me bazë bimore të proteinave, si fasulet, thjerrëzat dhe quinoa, janë të shkëlqyera për zorrët. Në të njëjtën kohë, ato kontribuojnë në shëndetin tuaj të përgjithshëm dhe në forcimin e sistemit tuaj imunitar.

The post Ushqimet që duhet të hani për një shëndet të mirë të zorrëve appeared first on Sot News | Lajme.

Operacioni Ndërkombëtar i Monitorimit i rekomandoi të martën Komisionerit Publik të apelojë vendimin e Komisionit të Pavarur të Kualifikimit për konfirmimin në detyre të prokurorit të Vlorës, Aurel Zarka, i arrestuar nga Prokuroria e Posaçme me akuzën e ushtrimit të ndikimit të paligjshëm.

Vëzhguesit ndërkombëtarë arsyetojnë se apelimi dhe një rishqyrtim i pasurisë dhe kritereve të tjera të rivlerësimit nga Kolegji i Posaçëm i Apelimit është bërë i nevojshëm pas arrestimit të Zarkës nga Prokuroria e Posaçme dhe akuzave ndaj tij për përfshirje në korrupsion.

“Vëzhguesit Ndërkombëtarë ftojnë Komisionerët Publikë të lexojnë dhe shqyrtojnë dokumentet e marra nga SPAK dhe Gjykata e Posaçme në ambientet e ONM-së. Apelimi do t’i mundësonte Kolegjit të Posaçëm të Apelit që të kryejë një hetim të plotë të çështjes, vlerësimin e pasurisë së subjektit, si dhe vlerësimin e figurës dhe aftësive të tij, i cili do të siguronte që ai vërtet ka besimin e publikut, rikthimi i të cilit është synim kryesor i procesit të vetingut dhe institucioneve që e zbatojnë atë”, thuhet në rekomandim.

Zarka u konfirmua në detyrë nga Komisioni i Pavarur i Kualifikimit më 28 qershor, pas një seance dëgjimore të shkurtër në të cilën nuk u vunë në dukje probleme që mund ta cënonin atë. Por një muaj më vonë, më 30 korrik, Zarka u arrestua nga Prokuroria e Posaçme.

Sipas SPAK, prokurori Zarka dhe personat e tjerë akuzohen se kanë ushtruar ndikim të paligjshëm për tetë çështje penale që po hetoheshin në katër prokurori të ndryshme – çështje të cilat lidhen kryesisht me aktivitete të krimit të organizuar si pastrimi i parave apo kultivimi i narkotikëve.

Interesi kryesor duket se lidhej me çështjen penale të njohur publikisht si “Toyota Yaris”, e cila u regjistrua pas bllokimit në portin e Durrësit në qershor të vitit 2018 të 3.4 milionë eurove të thata të fshehura në dy makina të përdorura dhe të importuara nga Belgjika.

“…Personat nën hetim, në bashkëpunim dhe në disa raste kanë ofruar dhe kanë premtuar përfitime të parregullta për të ushtruar ndikim te funksionarët e drejtësisë, kanë pranuar premtime dhe kanë përfituar përfitime të parregullta për të ushtruar ndikim te funksionarët e drejtësisë…,” thuhet në njoftimin e SPAK pas arrestimit të Zarkës. Përfaqësuesi ligjor i Zarkës, avokati Julian Mërtiri i mohoi akuzat ndaj Zarkës, sipas Mërtirit, bëhet fjalë “për biseda që nuk provojnë faktet”.

Vendimi i KPK-së për konfirmimin e Zarkës në detyrë u zbardh të hënën më 7 tetor dhe menjëherë pas bërjes publik të këtij vendimi, ONM ka rekomanduar apelimin e çështjes, duke vënë në dukje të dhënat e marra nga hetimi i SPAK si arsye.

ONM thotë se Zarka akuzohet nga SPAK për ushtrim të ndikimit të paligjshëm, korrupsion pasiv dhe korrupsion aktiv./BIRNI

The post U prangos me urdhër të SPAK/ ONM kërkon apelimin e konfirmimit për prokurorin e arrestuar, Aurel Zarka appeared first on Sot News | Lajme.

Në një emision televiziv ka patur debat lidhur me protestën mes gazetarit Mentor Kikia dhe deputetes demokrate Albana Vokshi, lidhur me ngjarjen ku mori flakë një qytetar nga bomba molotv.

Gazetari Mentor Kikia tha se se djegia e qytetarit me molotov, për shkak se polici e shtyu në drejtim të tij, është e rëndë. Por shtoi se dy rrugë ishin: ose do të digjej polici, ose ai do e largonte dhe do digjej qytetari.

“Ishte një veprim që duhet dënuar, por nëse nuk do e largonte do të digjej polici”, tha Kikia.

Më pas ka ndërhyrë Vokshi duke thënë se policia nuk mbron qytetarët.

“E dini ju pse na u hodh gazi në mënyrë joproporcionale te Parlamenti? Sepse u dogj ajo fotografia e Edi Ramës te selia e PS-së dhe për Edi Ramën fotoja është më e rëndësishme se mbrojtja e qytetarëve”, tha Vokshi.

Më tej ajo tha se protesta është analizuar, duke shtuar se aksioni opozitar do të vijojë.

“Nuk do të ketë aksion vetëm në Tiranë, nuk do jenë të përqendruara vetëm në Shqipëri, por do të kemi kontakte edhe me ndërkombëtarët. Duhet ta pranojmë se kemi defekt në këtë drejtim”, tha Vokshi.

The post “Ose do digjej polici, ose qytetari”, plas debati në studio mes gazetarit dhe deputetes:Ja pse na u hodh gaz lotsjellës appeared first on Sot News | Lajme.

Para viteve 90-të Doktor Ylli Ziçishti dhe Sali Berisha ndanin auditoret e mjekësisë, i pari student dhe i dyti pedagog, e më pas u bënë kolegë në spital.

Por pas viteve 90-të Ziçishti dhe Berisha përgjatë periudhës 2013-2017-të ishin përballë njëri-tjetrit si kundërshtarë politikë.

I ftuar në një emision televiziv Doktor Ziçishti ka rrëfyer marrëdhëniet e tij me Sali Berishën.

I pyetur nga moderatorja Borakaj nëse Berisha ishte më i mirë si mjek apo si politika, Ziçishti duke qeshur ka thënë se gjithmonë si mjek.

Pjesë nga biseda:

Ziçishti: Saliun unë kam njohur që në Fakultet, na ka dhënë Fizioterapi. Saliun e kisha edhe mësues kujdestar. Saliu ishte njeri studioz. Ne që e shihnim, Saliu shkonte i pari dhe dilte i fundit nga salla e studimit. Ne kishim repsekt. Në punë ishim bashkë, ishte më ndryshe nga të tjerët, kishte kokën e vet. Por para shefave tanë nuk vinim njeri. Para Petrit Gaçesh nuk vinim njeri.

Borakaj: Berisha ishte më mirë si mjek, apo si politikan?

Ziçishti: Si mjek, ça politikan.

Borakaj: Ju tha gjë kur ju pa si politikan në 2013-ën?

Ziçishti: Vetëm mua më takonte.

The post Sali Berisha më mirë si mjek apo si politikan? Ja si përgjigjet studenti i tij dhe ish deputeti i PS appeared first on Sot News | Lajme.

Deputetja demokrate Albana Vokshi, është shprehur se protesta e një dite më parë e opozitës, ishte revoltë qytetare.

E ftuar në një emision televiziv, ajo u shpreh se molotovi është më e pakta ndaj atyre që kanë shkelur Kushtetutën.

“Ministri i Brendshëm tha se është ushtruar dhunë ndaj institucioneve dhe Partisë Socialiste. Pra kemi një parti-shtet.

Ai qytetari që u plagos, z. Emiri u dëmtua nga molotovi që hodhi policia në drejtim të qytetarëve. Ne pa u afruar te Parlamenti u hodh gaz, pa pasur asnjë shkak.

Ne u sulmuam me gaz, ndërsa po afroheshim te Parlamenti. Policia ka hedhur gaz në mënyrë jo proporcionale. Nuk pati asnjë akt dhune, molotovët u hodhën në dyert e blinduara të Kryeministrisë, çfarë ndodhi? Pati dëme? Asnjë dëm.

Molotovi ishte më e pakta që mund të ndodhte ndaj atyre që ka grisur dhe shkelur Kushtetutën. Policia mbrojti një foto të Edi Ramës që po digjej, ndërkohë që nuk mbronte qytetarët”, tha Vokshi.

The post “Ishte revoltë qytetare”, Vokshi për protestën e opozitës: Molotovi është më e pakta ndaj atyre që kanë shkelur… appeared first on Sot News | Lajme.

Donald Trump i dërgoi fshehurazi makinat e testimit të Covid-19 tek Vladimir Putin në fazat e hershme të pandemisë, kur burime të tilla ishin në mungesë, zbulon reporteri veteran Bob Woodward në një libër të ri.

Sipas Woodward, Trump dërgoi në fshehtësi Putinit një grup makinerish testimi të Abbott Point of Care Covid për përdorimin e tij personal.

Në përgjigje, presidenti rus i tha homologut të tij amerikan: “Unë nuk dua që ju t’i tregoni askujt sepse njerëzit do të zemërohen me ju”.

Çuditërisht, Woodward raporton gjithashtu se marrëdhënia midis dy liderave ishte jashtëzakonisht e diskutueshme gjatë fushatës së parë presidenciale të Trump dhe katër viteve pasuese në Shtëpinë e Bardhë, ka vazhduar që kur Trump ka qenë jashtë pushtetit, përmes deri në shtatë telefonata private.

Në një skenë, Woodward rrëfen një moment në Mar-a-Lago ku Trump i thotë një ndihmësi të lartë të largohet nga dhoma në mënyrë që ai të mund të zhvillonte një telefonatë private me presidentin rus, Vladimir Putin.

The post “Mos i tregoni askujt”/ Zbulohet aleanca e fshehtë mes Trump dhe Putin gjatë Covid-19 appeared first on Sot News | Lajme.

Rreth 50 persona raportohet se janë lënduar në një aksident mes dy autobusëve në qytetin gjerman të Regensburg.

Një zëdhënës i policisë tha se 13 persona janë lënduar rëndë.

Aksidenti ndodhi në urën Nibelungen mbi lumin Danub dhe autoritetet janë ende duke hetuar shkakun e rrëzimit, tha zëdhënësi.

Përafërsisht 30 personel policie, 110 zjarrfikës, 170 punonjës të shpëtimit dhe një helikopter shpëtimi u dërguan, shtoi ai.

Sipas informacioneve, dy autobusët po udhëtonin njëri pas tjetrit rreth orës 17:15 kur ndodhi përplasja.

Shoferi i njërit prej autobusëve është në mesin e të lënduarve në gjendje të rëndë.

The post Aksident i rëndë, përplasen dy autobusë, raportohet për 50 të plagosur appeared first on Sot News | Lajme.

Gazetari Eni Ferhati ishte këtë të martë i ftuar në një emision televiziv për të folur rreth protestës së ditës së djeshme të mbajtur nga opozita.

Ferhati i cili e ndoqi protestën nga terreni tha  se policia kishte marrë informacione se do tentohej të digjej bashkia, ndaj edhe masat më të shumta të mara nga policia ishin pikërisht në atë zonë, ndërkohë që në Selinë e Partisë Socialiste, masat e marra ishin minimale.

Sipas Ferhatit policia ka patur fat ditën e djeshme pasi ka arritur të kap në kohë, tre çanta me Molotov të pashpërthyer.

“Policia ka patur edhe një fat shumë të madh. Kur protestuesit u zhvendosën drejt bashkisë së Tiranës, gjatë konfrotimit fizik mes policisë dhe protestuesve, janë gjetur, pas ii ranë në tokë, dy çanta me 17 molotov të palasura. Ato u sekuestruan menjëherë nga policia. Frika më e madhe dhe forcat më të mëdha të policisë ishin te bashkia e Tiranës, se kishte informacione edhe nga shërbimi informative, që turma do synonte të digjte bashkinë e Tiranës. Nuk kishte asnjë informacion për djegien e Selisë së Partisë Socialiste. Te selia kishte masa minimale të policisë, sepse nuk mendohej se do kishte protestë atje. Përveç dy çantave me 17 bomba molotov është gjetur edhe një çantë tjetër me 8 molotov të paplasur, diku mes zonës së Ministrisë së Brendshme dhe Parlamentit”

Ferhati u ndal gjithashtu te gabimet që ka bërë policia në këtë protestë.

“Vura re dy gabime të policisë. Gabimi i parë ishte kur policia nuk mori masa për të shmangur një ballafaqim të protestuesve me qytetarët, këtu i referohem momentit ku turma pasi u vendos te kryeministria marshoi në drejtim të unazës dhe u fut te rruga që të çon drejt partisë socialiste apo kryqëzimit të Myslym Shyrit dhe Gjykatës së Lartë. Ai ishte një moment ku kishte frikë edhe nga policia edhe nga protestuesit, pasi mund të kishte konflikt mes qytetarëve që mbetën në trafik dhe protestuesve. Ky është një gabim i policisë, që unë dyshoj se ka qenë i qëllimshëm, sepse informacioni ishte që protesta do ishte e lëvizshme. Momenti i dytë është përdorimi i pakriter, i paarsyeshëm i palogjikshëm i gazit lotsjellës. Aty nuk pati asnjë veprim të dhunshëm, sapo iu afruan protestuesit u lëshua disa herë gaz lotsjellës. Aty kishte qarkullim automjetesh. Një Fëmijë pati problem serioze nga ky gaz”,-tha gazetari.

The post “Kishte informacion se do digjej Bashkia”, Gazetari zbulon detaje: Policia gjeti 3 çanta me… appeared first on Sot News | Lajme.

Mbrëmjen e kësaj të marte në një emision televiziv, u diskutua protesta e opozitës, e cila përveç dhunës dhe hedhjes së molotovëve nuk prodhoi asgjë tjetër.

Komentatori politik, Mentor Nazarko tha se zgjedhja e protestës për të hënën u bë për një qëllim të vetëm, që lidhet me rritjen e pakënaqësisë popullore dhe për të ushtruar një presion ndaj qeverisë.

Sipas tij, qëllimi kryesor i saj ishte për të frikësuar ndonjë veprim, i cili ka karakter hetimor dhe procedural ndaj ish-kryeministrit Sali Berisha. Ai theksoi se pavarësisht kësaj, nuk sheh asnjë skenar apo sinjal, që mund të çojë në realizimin e kërkesave të opozitës e cila kërkon qeveri teknike.

“Qëllimet e dukshme të kësaj proteste, që mund të ishte zgjedhur të bëhej dita e diel, por u zgjodh një ditë, që ishte ditë punë aktive, me qëllim për të rritur efektin e pakënaqësisë popullore. Doktori duhet të ishte kujdesur që mos të ishte këtu. Berisha synon të rrisë dozën e presionit edhe mbi qeverinë në mënyre graduale. Unë mendoj se qëllimi real i tij, është për të frikësuar ndonjë veprim, i cili ka karakter hetimor dhe procedural ndaj tij. Mendoj se kjo është arsyeja reale. Nuk shoh asnjë disponimi perëndimor për qeveri teknike. Edhe nga ata që kanë qenë aleatë, si CDU”, tha ai.

Kujtojmë se pas protestës, CDU-ja gjermane me një gjuhë të qartë e ka konsideruar Sali Berishën si fajtor për frymëzimin e dhunës në protestën e 7 tetorit në Tiranë.

Zëdhënësi për çështjet evropiane të grupit parlamentar të CDU/CSU në Bundestag, Gunther Krichbaum, nënvizon se çdo akt dhune është krejtësisht i papranueshëm dhe tërësisht i padenjë për një vend që synon të bëhet anëtar i BE.

Kjo u komentua nga Mentor Nazarko, i cili tha se:

“Gunther Krichbaum kishte zgjedhur fjalë të forta për Berishën, që thoshte se me këtë akuzë, një udhëheqës evropian duhet të ishte në burg dhe jo në shtëpi komode siç është z. Berisha. Së dyti, ka thënë se PD duhet t’i nënshtrohet procesit të reformimit duke vendosur në krye një lider të besueshëm dhe së treti tha se SPAK është një institucion që gëzon mbështetjen e BE dhe SHBA dhe akuzat e tij duhet të adresohen në mënyrë të drejtë dhe institucionale. Berisha është njohur si prishës festash. E mbani mend kur ishte Samiti në dhjetor, Berisha zgjodhi ta bënte pikërisht atëherë protestën sepse do që Shqipëria do të hyjë në hartën e krizave dhe pasardhësi i tij, Rama, të mos marrë merita historike, siç është çelja e negociatave”, tha ai.

The post “Berisha synon të rrisë dozën e presionit edhe mbi qeverinë”, Nazarko: Qëllimi real i saj, për të frikësuar ndonjë.. appeared first on Sot News | Lajme.

Drejtuesi politik i PD-së në Tiranë, Belind Këlliçi thotë se protesta e radhës e opozitës do të zhvillohet brenda muajit Tetor, teksa ka shtuar se për pak ditë do të njoftojnë për tubimin tjetër.

I ftuar në në një emision televiziv, Këlliçi ka thënë se hapi i radhës është radikalizimi i mëtejshëm i protestave dhe përballja pa asnjë limit me mazhorancën.

Këlliçi u shpreh se po diskutohet që protesta mund të zhvendoset dhe para Parlamentit Evropian, ide për të cilën ai thotë se është plotësisht dakord.

Gazetari: Cili është hapi juaj i radhës?

Belind Këlliçi: Hapi jonë i radhës është radikalizimi i mëtejshëm i protestave, përballja pa asnjë limit me këtë mazhorancë dhe thirrja e protestës së radhës që për pak ditë do të njoftohet dhe padiskutim po diskutohet që mund të zhvendoset dhe para Parlamentit Evropian, unë jam padiskutim pro kësaj ideje.

Gazetari: Do të ketë brenda Tetorit protestë?

Belind Këlliçi: 99% po. Aksioni i radhës do të jetë brenda muajit Tetor me 99%. A është në Shqipëri apo jashtë, ky nuk është një vendim që e marr unë, por e merr Kryesia e PD-së dhe që e merr lidershipi i PD-së. Jam i bindur se brenda 2 javësh do të ketë një reagim të radhës që është i domosdoshëm për situatën ku jemi.

Këlliçi thotë se në zgjedhjet e 2025-ës, synimi i PD-së është t’i fitojë ato dhe për të bërë atë që ai e quan “luftë totale”.

The post “Protestë e mundshme para Parlamentit Evropian”/ Këlliçi zbulon hapat e radhës së opozitës appeared first on Sot News | Lajme.

Superkupa e Italisë tashmë e ka axhendën e dy ndeshjeve gjysmëfinale. Do të jetë fillimisht Inter – Atalanta, që merr jetë më 2 janar dhe më pas 1 ditë më vonë Juventus përballet me Milanin.

Pikërisht çfarë ëndërronin arabët, aty ku do zhvillohet dhe Superkupa e Italisë. Napoli, Fiorentina, Lacio dhe Interi ishin kundërshtarët e sezonit të fundit. Sigurisht që arabët ishin të kënaqur vetëm me këto të fundit.

Tashmë do të shijojnë përballje epike. Finalja e madhe ndërkohë do të luhet më 6 janar në stadiumin “Kingdom Arena”.

The post Superkupa e Italisë, zbardhet axhenda e gjysmëfinaleve appeared first on Sot News | Lajme.

Deputetja Monika Kryemadhi, e cila aktualisht është në proces divorci me bashkëshortin e saj, presidenti i Partisë së Lirisë, Ilir Meta, vijon angazhimet politike dhe partiake. Mësohet se Kryemadhi kërkon ndryshime ligjore që u japin forumeve të grave automatikisht 10% të buxhetit shtetëror për fushatat zgjedhore.

Bëhet me dije se Kryemadhi ka depozituar në Kuvend një nismë ligjore që synon garantimin e financimit të veçantë të fushatave zgjedhore të kandidateve gra. Në projektligj thuhet se “Të paktën 10% e financimit publik që përfitojnë partitë politike, u kalon në mënyrë të drejtpërdrejtë strukturave te grave brenda partisë politike dhe është i dedikuar për fuqizimin e vajzave dhe grave brenda partisë përkatëse”.

Kryemadhi e sheh këtë si një mënyrë që gratë në politikë të fuqizohen dhe të ecin përpara sipas meritokracisë.

The post Kryemadhi depoziton nismën në Kuvend,kërkon t’i marrë Metës 10% nga fondi që Partia e Lirisë merr nga buxheti i shtetit appeared first on Sot News | Lajme.

Një 58 vjeçar është gjetur i pajetë në një mjet tip kamion në fshatin Barç, në Korçë.

Mësohet nga informacionet paraprake se 58 vjeçari, Shpëtim Murati ka shkuar pranë një subjekti për ngarkim-shkarkim të disa materialeve nga kamioni.

Dyshohet se ka pësuar infarkt dhe ka ndërruar jetë brenda mjetit. Policia ndodhet në vendin e ngjarjes, ndërsa trupi po transportohet në morg për ekzaminim.

The post Ngjarje e rëndë në Korçë/ Gjendet i pajetë 58-vjeçari në një mjet, dyshohet se… appeared first on Sot News | Lajme.

Basha shpërndan videon me premtimet e Ramës: Sot u hodhi fajin bashkive për dështimin e qeverisë me legalizimet

Kryetari i PD-Demokratët Euroatlantikë, Lulzim Basha, shprehet se Rama ia hodhi fajin sot bashkive për dështimin e qeverisë së tij me legalizimet. Në një reagim në facebook, Basha ka shpërndarë një video me premtimet e Ramës në vitin 2013 dhe shkruan se kryeministri kishte gjithë pushtetin për të zgjidhur hallin e mijëra familjeve me pronën, por sipas tij, kështu e duan Shqipërinë, sepse pa pronë nuk ka demokraci dhe pa demokraci ata mbrojnë interesat e tyre në kurriz të interesave të shqiptarëve.

Ai më tej thotë se me rivendosjen e sigurisë së pronës, Shqipëria hyn menjëherë në orbitën e vendeve të zhvilluara, ky është edhe prioriteti i programit të Demokratëve Euroatlantikë.

Postimi i plotë i Bashës:

Sot Rama i’a hodhi “topin” e legalizimeve bashkive, por përgjegjësi për dështimin është ai që pati gati 12 vite kohë, por la në baltë qytetarët, sepse prioritet nuk ka shërbimin ndaj tyre.
Shqiptarëve nuk i’u japin pronën, por pronat e tyre i përdorin për t’u pasuruar ata dhe tarafi i tyre me pseudo-investitorë strategjikë, apo duke ndërtuar kulla.
Kishte gjithë pushtetin për të zgjidhur hallin e mijëra familjeve me pronën, por kështu e duan Shqipërinë, sepse pa pronë nuk ka demokraci dhe pa demokraci ata mbrojnë interesat e tyre në kurriz të interesave të shqiptarëve.
Siç e pranon vetë, nuk ka shanse ta bëjë as tani, aq më pak pas katër vitesh të tjera, prandaj dështimet e kësaj qeverie duhen lënë pas, për të zgjidhur me seriozitet dhe përgjegjshmëri problemet e pronës.
Me rivendosjen e sigurisë së pronës, Shqipëria hyn menjëherë në orbitën e vendeve të zhvilluara, ky është edhe prioriteti i programit të Demokratëve Euroatlantikë. Angazhimi ynë është zgjidhje e menjëhershme pa burokraci. Kthim i menjëhershëm i pronës aty ku është e lirë, kompensim me vlerë tregu ku është e zënë. Lëshimi i obligacionit/bonove nga shteti, që paguhen çdo vit me 1/20 e vlerës. Regjistrim i pronave me parimin “Uti Posidetis”.
Ne do të diskutojmë në hollësi programin tonë me çdo grup interesi, të bindur se, pas 34 vitesh rasakapitje me pronat, ka ardhur koha që qytetarët të zgjedhin duke mbrojtur interesin e tyre, duke refuzuar riciklimet e premtimeve të pambajtura, që kanë dëmtuar për kaq gjatë familjet shqiptare.
Shqipëria meriton më shumë!

The post Basha shpërndan videon me premtimet e Ramës: Sot u hodhi fajin bashkive për dështimin e qeverisë me legalizimet appeared first on Sot News | Lajme.

“Angazhimi me profesionistë të Diasporës”, nisi sot me një event të dedikuar aktivitetit profesional dhe artistik të gazetarit, profesorit dhe shkrimtarit frankofon, Skënder Sherifi, në mjediset e Ministrisë për Evropën dhe Punët e Jashtme. Skënder Sherifi është një përfaqësues i denjë i shkrimtarëve shqiptarë jashtë vendit, me një autoritet të pabesueshëm mes kulturës franceze dhe belge.

Në ceremoninë në nder të 50-vjetorit të veprimtarisë krijuese të shkrimtarit, ministri Hasani theksoi se, përmes kësaj nisme, MEPJ synon të vlerësojë kontributet e bashkëkombësve tanë jashtë vendit, duke forcuar lidhjen e thellë mes Shqipërisë dhe komunitetit të saj global.

“Veprat e Skënder Sherifit kanë pasuruar ndjeshëm trashëgiminë tonë letrare dhe kanë forcuar identitetin shqiptar në skenën botërore. Narrativat e tij kanë paraqitur me gjallëri historinë dhe kulturën tonë, duke sjellë në dritë tema që rezonojnë thellë me shoqërinë shqiptare”, theksoi Ministri Hasani, i cili i dorëzoi shkrimtarit çertifikatën e mirënjohjes.

Zv.Ministja e Ekonomisë, Kulturës dhe Inovacionit, Lira Pipa, theksoi rëndësinë e diasporës, duke e cilësuar atë si forcën më të madhe të progresit në Shqipëri që nga koha e rilindësve.

Takimin e përshëndetën Ambasadorja e Francës në Tiranë, Catherine Suard dhe ambasadori i Kosovës, Skënder Durmishi dhe në të morën pjesë pjesë përfaqësues të Ministrisë për Evropën dhe Punët e Jashtme, përfaqësues të Ministrisë së Ekonomisë, Kulturës dhe Inovacionit, trupit diplomatik të akredituar në Tiranë, përfaqësues të botës së artit dhe kulturës.

The post Nisma e Ministrisë së Jashtme, Hasani: Do promovojmë profesionistët e Diasporës appeared first on Sot News | Lajme.

Kryetari i Partisë Demokratike, Sali Berisha është ndalur mbrëmjen e sotme te protestuesit e arrestuar nga policia.

Berisha kërkoi lirimin e protestuesve dhe i siguroi se PD është pranë tyre në çdo moment.

Berisha: Mirëmbrëma dhe përshëndetjet më të përzemërta.

Mirënjohjen më të pakufishme ndaj jush, të cilët mbrëmë ishit më shumë se kurrë, më të fuqishëm se kurrë, më të pamposhtur se kurrë në mosbindjen civile, marshin drejt Tiranës.
Ju me protestën tuaj, me qëndresën tuaj, rezistencën e pamposhtur, mbetët pararendës të mosbindjes civile që do sjellë qeverinë teknike dhe votën e lirë të shqiptarëve.

Të dashur miq, një përshëndetje të përzemërt dua t’u përcjell demokratëve, të cilët narko-komisarët e pabesë i kanë arrestuar, Xhevahir Rrushi, Gentian Tugën, Ilir Tushën dhe Sokol Bushkolën.
I garantoj se PD, demokratët dhe demokratet, mbarë populli opozitar çdo minutë është me ta gjer në lirimin e tyre të plotë.

Qëndrestarë të pafajshëm, që kërkon Edi Rama me terror policor, t’i mposhtë.
Lironi vëllezërit, kjo është thirrja jonë!

Por sonte, në emër tuaj, unë dua t’u përcjell një përshëndetje vëllazërore të gjithë atyre burrave dhe grave, të rinjve, të rejave, të moshuarve që firmosën dje në cunamin e mosbindjes civile, fillimin e betejës së madhe të fitores sonë.

Në emër tuaj, dua t’u them se ata kanë ardhur shumë herë në Tiranë, por asnjëherë në jetën e tyre nuk kanë qenë si mbrëmë në Tiranë.
Ju gra dhe burra, të rinj dhe të reja, adoleshentë, pensionistë, inauguruat mbrëmë misionin e ri më të rëndësishëm, më fisnik të jetës suaj.

Ju nuk erdhët mbrëmë në Tiranë për festë, miting elektoral, ju nuk erdhën mbrëmë në Tiranë për protestë.
Jo, secili prej jush mbrëmë i njoftuar siç e do rregulli, erdhët jo për protestë, për mosbindje civile. Pra, erdhët për betejë.
Ju mbrëmë, pa asnjë detyrim nga askush, iu përgjigjët thirrjes së ndërgjegjes suaj dhe erdhët për betejë. Ju në fakt mbrëmë zhvilluat betejën e mosbindjes civile me të madhen, më të fuqishmen që Tirana ka parë në 32 vite.

Ju, duke tejkaluar cdo parashikim erdhët mbrëmë për t’u ndeshur me regjimin, pavarësisht nga pasojat që kjo ndeshje mund të kishte sepse ky regjim i kishte shpallur luftë opozitës. Është një armik i egër i popullit opozitar.

Ju e dini mirë se të përballeni me Edi Ramën, i cili Kushtetutën e ka shndërruar në Olta Xhaçkë, parlamentin e ka shndëërruar në Spirogjokë, qeverinë e ka zëvendësuar me Lubi Ballukun apo Tao Taon, ligjet e vendit i ka zëvendësuar me Irenën me 5 mbiemra, xhelatë të sigurimit dhe Altinë të pyetjes 1 milion euro, nuk është e lehtë, por ju erdhët sepse keni vetëdijen e plotë se Edi Rama nuk fiton, por grabit zgjedhjet.
Ju erdhët se jeni të bindur se Edi Rama me serial killerat e tij, me bandat e tij, me makinerinë e frikësimit të zgjedhësve, me industrinë e blerjes së votës dhe të drejtës së saj, me partinë shtet kontrollon votën tuaj dhe njëlloj si diktaturat e bandave shndërron krimin në votë dhe votën në krim.

Ju jeni të bindur se pa votën e lirë nuk ka kurrë rotacion, por pushtet autoritar që nuk ikën për dekada.
Ju dolët në shesh të mejdanit kundër diktaturës me një nga 77 format e mosbindjes civile.
Sepse ju e keni të qartë se burgosja politike është akt i diktaturave, se me burgosjen e udhëheqjes politike në vit elektoral, lidhet vendimi i Edi Ramës për një mandat të katërt.

Ju erdhët në shesh të betejës sepse e dini se kontrolli i drejtësisë është tipar i diktaturës së bazuar në drogën, krimin, vjedhjen e shqiptarëve siç ishte dje në ideologjinë komuniste.
Ju dolët dje në shesh të mejdanit sepse ju nuk pranoni vendosjen e diktaturës së bandave, në të cilën narkodiktatori kontrollon me dorë të hekurt qeverinë, parlamentin, presidentin, shërbimin e fshehtë, drejtësinë dhe i ndërsen ata si vegla kundër opoziëts për të shtypur atë, për t’i vjedhur asaj votën, për të vjedhur dhe pasuruar veten dhe sojin e tij.

The post Protestuesit e arrestuar/ Berisha me tone të ashpëra qeverisë: Lironi vëllezërit, jemi pranë tyre në çdo minutë appeared first on Sot News | Lajme.

Një aksident automobilistik ku janë përfshirë tre automjete ka ndodhur mbrëmjen e së martës në rrugën kryesore Antipatrea në lagjen Mangalem, ku automjeti tip Opel me targa te huaja ka goditur mjetin tip Volkswagen me targë AA 590 ZB i cili ishte në pritje të semaforit.

Nga goditja e fortë është dëmtuar gjithashtu dhe mjeti Mercedes Benz i cili ndodhej përpara makinës Volkswagen.

Si pasojë e këtij e këtij aksidenti një nga pasagjerët që ndodhej në makinën tip Opel është dërguar me urgjencë drejt Spitalit Rajonal Berat, ku ndodhet jashtë rrezikut për jetën.

Në vendngjarje kanë mbërritur forcat blu ku bënë këqyrjen e terrenit për të nxjerrë dhe shkaqet që sollën aksidentin ku u përfshinë tre automjete.

The post Aksident ‘zinxhir’ në Berat, 3 automjete përplasen me njëra-tjetrën, zbardhen detajet e para appeared first on Sot News | Lajme.

Netët e Festivalit të 63-të në Radiotelevizionin Shqiptar po afrojnë, dhe tashmë kemi listën zyrtare me emrat e artistëve të përzgjedhur nga Komisioni Përzgjedhës për Kualifikimin e Këngëve Pjesëmarrëse në Festivalin e 63-të të Këngës në RTSH.

Nga këngët pjesëmarrëse janë përzgjedhur 30 këngë, të cilat do të jenë pretendente për çmimet e këtij Festivali, pa diskutim edhe pretendente për të përfaqësuar Shqipërinë në Eurovizion.

Ky edicion do të kombinojë talentin e artistëve të mëdhenj dhe zërat e rinj.

Më poshtë do të gjeni listën e këngëtarëve që do të garojnë në Festvalin e 63 të Këngës:

Algert Sala
Alis Kallacej
Ardit Çuni
Devis Xherahu
Djemtë e Detit
Elvana Gjata
Endrik Beba
Epos Grup
Erma Mici
Frensi Revania
Gjergj Kaçinari
Gresa Gjocera
Jet
Kejsi Jazxhi
Kleansa Susaj
Laurjan Ejlli ft. Adelina Corraj
Lorenc Hasrama
Luna Çausholli
Mal Retkoceri
Martina Serreqi
Mihallaq Andrea
Nita Latifi
Olsi Bylyku
Orgesa Zaimi
Rea Nuhu
Ronaldo Mesuli
Santino De Bartolo
Shkodra Elektronike
Stine
Vesa Smolica

The post Shpallen emrat e këngëtarëve pjesëmarrës në Festivalin e 63 të Këngës appeared first on Sot News | Lajme.