Lediona Asabella, punonjëse sociale në Gjimnazin ‘Besnik Sykja’ në Tiranë, është shprehur se është përhapur një trend i ri te gjimnazistët, të cilët bëhen grupe nga 10 veta dhe marrin shtëpi me qira ditore, ku konsumojnë lëndë të ndryshme narkotike.

Komentet Asabella i bëri në emisionin ‘Review’ në Euronews Albania, ku tha se kjo metodë e bën më të vështirë që ata të kuptohen nga prindërit apo të afërmit që po konsumojnë drogë.

Ajo tha gjithashtu se në këto raste prindërit janë në vështirësi nëse duhet t’i lejojnë ose jo, duke menduar se nëse nuk i lejojnë të shkojnë në këto ambiente, do i ndajnë nga shoqëria.

“Gjimnazistët përveçse vijnë me ato bebet e syrit që janë fare të papërqëndruar dhe që zyshat i kuptojnë dhe thonë ‘shiko se filan nxënës e shikoj të shpërqëndruar dhe ka ndryshim të sjelljes’. Ajo që vë re është se një trend i ri i të rinjve sot është që të marrin ambiente me qira, kur e kanë mundësinë ekonomike.

Bashkohen 10 veta dhe e bëjnë festën në një ambient të mbyllur ku dikush i sjell këto karamele dhe të gjitha gjërat dhe nuk kuptohet shumë. Pra sado të jetë prindi i vëmendshëm, ajo nuk tregtohet lirshëm. Ajo vjen në forma të ndryshme. Marrin një shtëpi me qira, mblidhen 20 veta. Aty mund të qëndrojnë një natë. Prindi është në atë dyzimin, ‘ta lej, mos t’ja prish, se grupi e kërkon, gjithë grupi shkon, nuk po e lë vetëm’.

Kjo është e njëjta gjë me telefonin që thonë ‘t’ja blej se gjithë grupi e ka’ dhe fillon varësia. Ajo që më kanë thënë është se është shumë trend sëfundmi. Marrin një ambient, ose vilë që është larg që Policia të ndërhyjë dhe i marrin këto ambiente dhe si fillim i nisin këto gjëra”, tha Asabella.

LEXONI GJITHASHTU:

• Në kërkim për drogë e grabitje me armë, 2 të ekstraduar drejt Shqipërisë e Italisë
• Drogat haluçinante, kokaina, heroina| Thoma shpjegon pasojat: Si ndikojnë në tru

The post Asabella tregon trendin: Adoleshentët marrin shtëpi me qira dhe konsumojnë drogë appeared first on Euronews Albania.

Donald Trump ka thënë se është tepër vonë për një tjetër debat presidencial, teksa po iu drejtohej turmave në një tubim të fushatës në shtetin fushëbetejë të Karolinës së Veriut.

Sipas mediave të huaja, ish-presidenti kritikoi kundërshtaren e tij Kamala Harris, duke e quajtur atë të paaftë, teksa shtoi se nuk do të marrë pjesë në një debat tjetër presidencial të sugjeruar nga CNN.

Më herët këtë mbrëmje, zonja Harris pranoi një ftesë nga media për të marrë pjesë në debatin presidencial në tetor.

Trump u thotë mbështetësve të tij se ai tashmë ka marrë pjesë në dy debate, një kundër Joe Biden në qershor dhe një kundër zonjës Harris në ABC në fillim të këtij muaji.

“Problemi me një debat tjetër është se është shumë vonë. Votimi tashmë ka filluar,” shtoi ai.

Ai thotë se Harris “po humbet keq” dhe krahasohet me një luftëtar që do të eliminohet dhe kërkon një revansh.

“Ajo ka bërë një debat. Unë kam bërë dy. Është tepër vonë për të bërë një tjetër,” thotë ai.

Karolina e Veriut votoi ngushtë për zotin Trump mbi Biden në vitin 2020, me më pak se 100,000 vota në garë për këtë shtet, popullsia e të cilit është më shumë se 10 milionë banorë.

Sondazhet e fundit kanë zonjushën Harris që kryeson në Karolinën e Veriut, por vetëm pak.

LEXONI GJITHASHTU:

• SHBA: Irani i ofroi fushatës së Bidenit të dhëna të vjedhura të Trumpit
• Trump akuzon Biden dhe Harris se kanë nxitur sulme ndaj tij me retorikën e tyre

The post Trump refuzon ftesën: Është tepër vonë për një tjetër debat presidencial me Harris appeared first on Euronews Albania.

Presidenti ukrainas, Volodymyr Zelensky, tha të shtunën se përfundimi i luftës me Rusinë varet nga “vendosmëria” e aleatëve perëndimorë të Kievit në sigurimin e armëve të nevojshme. Ai tha se Perëndimi duhet ta lejojë Ukrainën që t’i përdorë armët e fuqishme për të goditur thellë brenda Rusisë, veprim që kundërshtohet nga Uashingtoni.

Presidenti ukrainas tha se takimet e tij në Shtetet e Bashkuara, javën e ardhshme, mund të jenë “vendimtare” për ndalimin e agresionit rus ndaj vendit të tij dhe përfundimin e luftës.

Ndërkohë, Ministri i Jashtëm i Ukrainës tha të shtunën se Rusia po planifikon sulme ndaj objekteve bërthamore të Ukrainës në prag të dimrit. Kryediplomati ukrainas, Andriy Sybiha, u bëri thirrje vendeve aleate dhe organizatës së Kombeve të Bashkuara për energjinë bërthamore që të krijojnë misione të përhershme vëzhgimi në centralet bërthamore të Ukrainës.

“Sipas organeve ukrainase të zbulimit, Kremlini po përgatitet të sulmojë objektet kritike të energjisë bërthamore të Ukrainës përpara dimrit”, shkroi në rrjetin X kryediplomati ukrainas. “Në veçanti, ka të bëjë me nënstacionet e transmetimit të energjisë elektrike, kritike për funksionimin e sigurt të centralit bërthamor”.

Ai nuk dha detaje se pse Kievi besonte në përgatitjen e sulmeve të tilla. Deri në publikimin e lajmit nuk ka patur reagime nga Moska.

Agjencia Ndërkombëtare e Energjisë Atomike (IAEA), nuk iu përgjigj menjëherë një kërkese për koment.

Shefi i kabinetit të presidentit të Ukrainës, Andriy Yermak, bëri thirrje për një përgjigje të shpejtë globale ndaj kërcënimit të supozuar rus për sulme ndaj një objekti bërthamor.

“Kjo është përgatitje për një skenar të mundshëm fatkeqësie bërthamore. Rusia është terroriste”, shkroi ai në rrjetin Telegram, shkruan VOA.

Rusia ka ndërmarrë një fushatë të gjerë bombardimesh të rrjetit elektrik të Ukrainës që nga vjeshta e vitit 2022. Sulmet ruse kanë dëmtuar ose shkatërruar pjesën më të madhe të kapaciteteve prodhuese të energjisë termike. Bombardimet ruse madje kanë goditur edhe diga por predhat e saj ende nuk kanë vënë në shënjestër centralet bërthamore të kontrolluara nga Ukraina.

Në vitin 2022 Ukraina e akuzoi Rusinë për shantazh bërthamor pasi forcat e Kremlinit pushtuan centralin bërthamor Zaporizhzhia, më i madhi në Evropë. Moska e ka hedhur poshtë akuzën.

LEXONI GJITHASHTU:

• Zelensky kërkon përshpejtim të ndihmës ushtarake për Ukrainën
• Zelensky: Një raketë ruse goditi një anije që transportonte grurë në Detin e Zi

The post Zelensky: Përfundimi i luftës me Rusinë varet nga vendosmëria e aleatëve appeared first on Euronews Albania.

Mjekja toksikologe Esmeralda Thoma ka treguar në emisionin ‘Review’ në Euronews Albania efektet e drogave të ndryshme, si kokaina, heroina, metamfetamina, si dhe të drogave haluçinante si kërpudhat, LSD dhe Ketamina.

Thoma tha se heroina futet në grupin e drogave depresive, ndërsa kokaina dhe metamfetamina në grupin e drogërave psikostimuluese, të cilat sipas saj japin te njeriu eufori dhe entuziazëm.

Ndërsa drogat haluçinante sipas saj kanë si efekt humbjen e sensit real të vendit dhe kohës.

“Personat me mbidozë kokaine zënë vendin e parë që paraqiten në Urgjencë, pas atyre që paraqiten nga alkooli. Numri i rasteve që vijnë në urgjencë nga alkooli është shumë i lartë. Kokaina zë vendin e dytë. Mbidozimet me kokainë ose rastet e varësisë nga kokaina. Përsa i përket heroinës, metamfetaminës dhe kokainës, heroina i përket një grupi të caktuar drogërash, që janë drogëra depresive, ndërsa kokaina dhe metamfetamina janë drogëra psikostimuluese.

Që do të thotë heroina jep në momentin e parë të konsumimit një lloj euforie, e cila zhduket shumë shpejt pastaj dhe problemet që vijnë më pas janë ato të frenimit apo reduktimit të të gjitha funksioneve të trupit, duke nisur nga sistemi nervor qëndror dhe më poshtë. Ndërsa drogërat psikostimuluese janë drogëra që kanë efektin e shtimit të madh të euforisë, entuziazmit. Pra janë drogëra eksituese.

Çdo sistem i trupit është i përshpejtuar. Truri reagon më shpejt, ata janë gjithë kohës duke folur, duke lëvizur. Ka rritje të tensionit arterial. Dhe në fakt në rastet e mbidozimeve me këto dy drogëra, vdekja vjen si pasojë e infarktit të miokardit, pra nga ngarkesa e madhe që i ushtrohet zemrës, ose nga aksidentet vaskolare, që vijnë si pasojë e ngushtimit të enëve të gjakut.

Nëse flasim për LSD, Kërpudhën, Ketaminën, këto janë një tjetër grup drogërash, që janë drogëra haluçinante. Këto humbasin senset reale të vendit, të hapësirës. Kanë disa lloje perceptimesh. Sensi që u kalon diçka nëpër trup, ose shikojnë ose dëgjojnë gjëra jo të vërteta”, tha Thoma.

LEXONI GJITHASHTU:

• Në kërkim për drogë e grabitje me armë, 2 të ekstraduar drejt Shqipërisë e Italisë
• Në kërkim nga Kosova, arrestohen në Tiranë 2 të dënuar për trafik droge

The post Drogat haluçinante, kokaina, heroina| Thoma shpjegon pasojat: Si ndikojnë në tru appeared first on Euronews Albania.

Një zjarr ka shpërthyer në një depo raketore ruse në rajonin Tver thellë brenda vendit, pasi ajo u shënjestrua nga një sulm me dron ukrainas, tha Ministria e Mbrojtjes në Moskë.

Sipas mediave të huaja, pamjet tregojnë një sulm të dytë ukrainas me dron në rajonin jugperëndimor rus të Krasnodarit, i cili gjithashtu shkaktoi një zjarr dhe shkaktoi një seri shpërthimesh.

Ministria ruse e Mbrojtjes ka pretenduar se forcat e saj kanë rrëzuar 101 dronë ukrainas mbi territorin rus gjatë natës.

Sulmet me dron u kryen pasi udhëheqësi ukrainas Volodymyr Zelenskky tha se shpreson të takohet me Donald Trump javën e ardhshme, kur ai të udhëtojë për në SHBA, ku do t’i prezantojë presidentit amerikan Joe Biden një “plan fitoreje” në lidhje me luftën.

Ndërkohë, ministri i Jashtëm i Ukrainës tha se Rusia duket se po planifikon sulme ndaj objekteve bërthamore të Ukrainës para dimrit.

Postimet në kanalet lokale Telegram thanë se një sulm me dron ukrainas goditi një depo armësh pranë qytetit Toropets, në rajonin Tver të Rusisë – që është rreth 380 kilometra (240 milje) në veriperëndim të Moskës dhe rreth 500 kilometra (300 milje) nga kufiri ukrainas.

Autoritetet ruse mbyllën një shtrirje prej 100 kilometrash (62 milje) të një autostrade dhe evakuuan pasagjerët nga një stacion hekurudhor aty pranë.

Depoja dukej se ishte vetëm disa milje larg një arsenali rus të armëve që ruan raketa, bomba dhe municione në Tver që u godit nga dronët ukrainas herët të mërkurën, duke plagosur 13 persona dhe gjithashtu duke shkaktuar një zjarr të madh.

Ndërkohë, të paktën 1,200 njerëz u evakuuan nga rajoni jugperëndimor i Krasnodarit të Rusisë pasi një depo municioni dhe arsenal raketash u goditën në sulmin e dytë me dron gjatë natës, tha guvernatori lokal.

Shumica e të evakuuarve qëndronin me miqtë dhe të afërmit, tha Veniamin Kondratyev, guvernatori i rajonit të Krasnodarit, në aplikacionin e mesazheve Telegram.

Nuk ka pasur raporte të menjëhershme për viktima as në Tver e as në Krasnodar.

Këto zhvillime vijnë pasi Kievi po i kërkon Agjencisë Ndërkombëtare të Energjisë Atomike (IAEA) dhe aleatëve të Ukrainës që të krijojnë misione të përhershme monitoruese në centralet bërthamore të vendit, pasi paralajmëron se ato mund të jenë në shënjestër të sulmeve ruse.

“Në veçanti, ka të bëjë me pajisjet e hapura të shpërndarjes në centralet bërthamore dhe nënstacionet e transmetimit, kritike për funksionimin e sigurt të energjisë bërthamore,” shkroi ministri i Jashtëm Andriy Sybiha në rrjetin social ‘X’.

LEXONI GJITHASHTU:

• Ukraina i bashkohet NATO-s në stërvitje për testimin e sistemeve kundër dronëve
• Presidentja e KE-së në Kiev për të diskutuar mbështetjen për Ukrainën

The post Sulmi ukrainas me dron, shpërthim i madh në depon e armëve brenda Rusisë appeared first on Euronews Albania.

Luljeta Sharani, nëna që humbi 2 djemtë dhe bashkëshortin në Luftën e Kosovës, ka rrëfyer për emisionin ‘Real People’ në Euronews Albania historinë e dhimbshme të familjes së saj.

Luljeta ka treguar me detaje jetën e saj pas martese dhe sjelljen në jetë të tre fëmijëve, ditëlindjet e të cilëve i mban mend edhe sot.

Ajo tha se fëmijëria e saj ishte e bukur dhe martesa e saj me Skifer Sharanin ishte një fat i madh për të, pasi sipas saj, ata ishin familje shumë e mirë.

“Kemi jetuar sëbashku. Unë këtu erdha nuse në vitin 1976. Isha vajzë Gjakove dhe u martova në Gjakovë. Kisha lindur në qendër të qytetit. Fillimet e fëmijërisë time kanë qenë shumë të mira. Fatmirësisht edhe u martova me familje shumë të mirë. Kishin edukatë dhe kulturë të jashtëzakonshme. Skiferi ka lindur pas 2 vajzave, pas motrave dhe si në traditën e shqiptarëve kur që presin çunin, ato organizuan një ceremoni shumë të madhe.

Fabrikat më të shumta kanë qenë në Gjakovë. Skiferi ka qenë inxhinier i makinerisë. Por disa vite pa filluar lufta filluan t’i largojnë nga puna. Por Skiferi si njeri i ngritur, si drejtor tha ‘më vjen inat që të më largojnë ata nga puna, kështu që po iki vetë’. Nënë u bëra më 23 korrik 1977 me Valonin, djalin e parë.

Skiferi vetë ja vuri emrin se ka qenë në shërbimin ushtarak. E vendosi Valon për valimin e flamurit. Skiferi gjatë shërbimit ushtarak ka qenë në Beograd dhe një muaj në Shkup. Ai ikte në fundjavë dhe kur ka lindur Valoni Skiferi ka qenë vetë këtu. Fëmija i dytë në 15 janar 1979, Visari. 1 vit e gjysmë diferencë. Vajza, Arjeta, ka lindur në 25 korrik 1983. Me Valonin kishte 6 vite, me Visarin 4 e gjysmë”, tha Luljeta Sharani.

LEXONI GJITHASHTU:

• A rrezikohet Kosova nga lufta? Bushati: Vëmendja te qendra e Rusisë në Nish
• “Lufta e radhës në Kosovë”, mesazhi i mercenarëve serbë në ushtrinë ruse në Ukrainë

The post Humbi burrin e 2 djemtë në Luftën e Kosovës, rrëfimi i Luljetës për familjen Sharani appeared first on Euronews Albania.

Shumë gra korçare, çdo mëngjes, me fshesë pastrojnë jo vetëm oborrin por edhe sokaqet e hapësirat e përbashkëta, duke bërë kështu që Korça të jetë një nga qytetet më të pastra në Shqipëri e duke mbajtur gjallë traditën qindra-vjeçare.

76-vjeçarja Tatjana, që e vogël është rritur në këtë lagje të Korçës. Tradita ishte që çdo nuse e shtëpisë duhet të pastronte ambjentin përpara banesës, një punë e cila është kthyer në rutinë për pensionisten që vijon ta ruaj si traditë.

Edhe Marjana është banore në një nga rrugicat e kalldrëmta të qytetit. Ajo tregon se gjyshja ishte e para që e mësoi ta bëntë këtë gjë çdo mëngjes.

“Gjithmonë në mëngjes dilnim fshinim, kishim kova, tani ka qese plastike. Vazhdojmë njësoj. Çdo mëngjes, oborr, sokak dhe mbrapa shtëpisë. Shumica korçare dalin”, tha Tatjana Dhëmbo, banore e lagjes nr.1 të qytetit.

“Ne e kemi traditë në Korçë që fshijnë oborrin, rrugën, shtëpinë, të gjitha. E kemi pastërti. Unë kam nisur që e vogël. Duke parë mamanë, gjyshen, motrat, vetë, e kam qejf të jetë gjithnjë e pastër dhe e mire”, tha Marjana Karamitro, banore e lagjes nr.1.

Tradita e dikurshme po humbet, pasi vajzat e reja nuk e prekin më fshesën me dorë – thonë dy gratë korçare.

“Mbetemi ne vjehrrat. Tradita e pastrimit po humbet. Ja ne jemi një rrugë e tërë, tek ai pallati është gjithë plehra. Nuk e duan, me vjen keq, brezi ynë do e beje pastaj harroje, do behet si qytetet e tjera”, tha Tatjana.

“Të rejat nuk e kanë, merren me punë, duhet ta kesh në gjak. Sidmos jo rrugët karakteristike por as në pallate nuk e bëjnë, le për të dëshiruar. Me vjen keq se e dua Korçën, pastërtinë”, tha Marjana.

Në ditën botërore të pastrimit, shembulli vjen nga Korça, aty ku një fshesë, një përshëndetje dhe pak dashuri për qytetin përkthehet në atë çka shohim sot, një Korçë të pastër.

LEXONI GJITHASHTU:

• Lirohen politikanët serbë, penguan pastrimin e grafiteve me shkrime nacionaliste
• Franca kryen operacion pastrimi për kompjuterët e infektuar nga 1 program spiunazhi

The post Tradita e grave korçare, pastrimi i rrugicave i trashëguar ndër breza po humbet appeared first on Euronews Albania.

Në kuadër të  “Muajit të Monumenteve të Kulturës” dhe 80-vjetorit të Çlirimit të Shqipërisë, në muzeun etnografik Elbasan është çelur një ekspozitë nga Instituti Kombëtar i Trashëgimisë Kulturore.

Ekspozita solli për publikun materiale grafike të monumenteve kulturore të cilat janë dëshmi e trashëgimisë sonë të pasur.

Specialisti Andrea Pambuku thotë se qëllimi kryesor është promovimi i trashëgimisë kulturore.

“Jemi vendosur në Elbasan meqenëse kemi të bëjmë me një monument të trashigimisë kulturore, por njëkohësisht edhe përsa i përket vlerave të saj unike. Ekspozita jonë “Muaji i Monumenteve” është një iniciative krahas Shtatorit që është muaji i monumenteve dhe 80 vjetori i çlirimit të atdheut, është inicative IKTK për të nxirrë në pah fotografi, dhe grafika që janë punuar që nga fillimi i institutit”, tha Andrea Pambuku, specialist në Institutin Kombëtar të Trashëgimisë Kulturore.

Me këtë ekspozitë, synohet ruajtja dhe promovimin e trashëgimisë kulturore të Shqipërisë, duke shërbyer si një urë lidhëse mes të kaluarës së pasur dhe brezave të rinj.

“Kjo i shërben si shpalosjes dhe njohjes së ketyre monumenteve, por me shumë është çështje edukimi. Në fakt këtu është një ambjent i veçantë sepse dhe vetë ky ambjent është monument i trashigimisë kulturëre e Elbasanit. Është një ekspozitë që ngjall mjaft interes dhe siç e shifni edhe ne keto momente që e frekuentojnë dhe shofin gjitha ketë trashigimi të pasur që kemi si komb”, tha Artur Guni, drejtor i Agjensisë së Turizmit dhe Kultirës, Bashkia Elbasan.

Elbasani është një nga qarqet më të pasura arkeologjike dhe për rrjedhojë edhe i monumenteve të kulturës, çka ka rritur interesin e vizitorëve për to.

LEXONI GJITHASHTU:

• World Press Photo 2024 në Tiranë, ekspozita paraqet foto nga 130 vende të botës
• Çelet ekspozita e foto-arkivit në Gjirokastër, shfaqen 80 objekte kulti të vendit

The post “Muaji i Monumenteve të Kulturës”- Çelet ekspozitë në Muzeun Etnografik të Elbasanit appeared first on Euronews Albania.

“2024 Wanda Diamond League” uli siparin pak ditë më parë në një sesion finalesh dramatike në Bruksel. 32 kampionët në “Wanda Diamond League” u kurorëzuan në harkun e dy ditëve në “Allianz Memorial Van Damme” me disa fitues të papritur që iu bashkuan emrave të mëdhenj në podium. Në vazhdim ju njohim me ata që morën trofeun “Diamond” në shtëpi.

Konfirmimet

Në podiumin e Brukselit u ngjitën sportistë të njohur të cilët zgjatën më tej serinë positive të dominimit në “Diamond League”.

Mondo Duplantis (kërcim me shkop meshkuj x 4)

Femke Bol (400m me pengesa x 4)

Faith Kipyegon (1500m femra x 5)

Jakob Ingebrigtsen (1500m meshkuj x 4)

Yaroslava Mahuchikh (kërcim së larti x 3)

Marileidy Paulino (400m x 3)

Valarie Allman (disk femra x 3)

Emmanuel Wanyonyi  (800m x 2)

Matthew Denny (disk meshkuj x 2)

Haruka Kitaguchi (shtizë x 2)

Befasitë

Nuk do të ishin finalet e shumëpritura në “Diamond League” pa disa nga surprizat në historinë e displinës që kishte rezervuar eventi në Bruksel.

Charlie Dobson (400m meshkuj)

Amos Serem (3000m me pengesa, meshkuj)

Faith Cherotich (3000m me pengesa, femra)

Ackeem Blake (100m, meshkuj)

Tajay Gayle (kërcim së gjati, meshkuj)

Kenny Bednarek (200m, meshkuj)

Rishtarët

Ishte një vit i mirë për ata që fituan një trofe për herë të parë. Kjo kuptohet më mirë kur sheh se 14 nga 32 kampionët e vitit 2024, nuk kishin fituar asnjë trofe “Diamond” më herët.

Anderson Peters (shtizë,meshkuj)

Jasmine Camacho-Quinn (100m me pengesa, femra)

Julien’e Alfred (100m femra)

Sasha Zhoya (110m me pengesa, meshkuj)

Leyanis Perez-Hernandez (tre hapësh femra)

Brittany Brown (200m)

Larissa Iapichino (kërcim së gjati)

Sarah Mitton (gjyle femra)

Leonardo Fabbri (gjyle meshkuj)

Rikthimet e mëdha

Nëse 14 fitues provuan për të parën herë ndjesinë e suksesit në “Diamond League”, një numër jo i pakët kampionësh u rikthyen në podium gjatë këtij viti duke lënë pas zhgënjimet e shkuara.

Nina Kennedy (kërcim me shkop femra)

Beatrice Chebet (5000m femra)

Berihu Aregawi (5000m meshkuj)

Mary Moraa (800m femra)

Alison Dos Santos (400m me pengesa, meshkuj)

Pedro Pichardo (tre hapësh meshkuj)

Gianmarco Tamberi (kërcim së larti)

LEXONI GJITHASHTU:

• Britania mbron vendimin për pezullimin e eksportit të disa armëve në Izrael
• Detaje të fshehura në foton virale të Messit dhe Ronaldos

The post Superyjet dhe surprizat në Diamond League 2024 appeared first on Euronews Albania.

Lando Norris vendosi “pole position” në “Singapore Grand Prix” pas një paraqitjeje më të mirë se Max Verstappen në Provat Zyrtare që u zhvilluan në Marina Bay dhe u transmetuan në Euronews Albania dhe IN Radio. Në fillimin e sesionit të 3, Carlos Sainz humbi kontrollin dhe përfundoi në muret mbrojtëse. Piloti i McLaren, Lando Norris vendosi një kohë record prej 1m 29.525s, disa të dhjetat më i shpejtë se Verstappen në bordin e Red Bull dhe rivalët e Mercedes.

Leëis Hamilton la pas disa probleme me balancimin e makinës dhe u vendos në vendin e 3 përpara shokut të skuadrës George Russell, që u ndoq nga australiani i McLaren, Oscar Piastri. Ferrari kaloi nga një dramë te tjetra me Carlos Sainz që gjeti muret mbrojtës në Singapor pas incidentit në Baku. Spanjolli mbeti në vendin 10’të, një vend më poshtë Charles Leclerc, koha e të cilit u fshi për tejkalimin e limiteve të pistës. Nico Hulkenberg feston një vend të 6 për Haas pas një tjetër performance spektakolare të gjermanit. Aston Martin i Fernando Alonso’s dhe RB me Yuki Tsunoda’n u vendosën përpara problemeve të “Scuderia’s” në vendet 7 dhe 8.

Alex Albon dhe Franco Colapinto iu afruan një tjetër kualifikimi të dyfishtë në sesionin e 3 por në fund u detyruan që Williams të niset nga rradha e 6’të. Diferenca mes tyre ishte vetëm 7 tw mijëtat e sekondës Ndërsa përpara incidentit të Sainz ishte dështimi i rradhës për Sergio Perez që u eleminua në sesionin 2 për një vend të 13 zhgënjyes. Kjo është rradha e nisjes në “Singapore GP” që do të transmetohet në Euronews Albania dhe IN Radio:

1. Lando Norris (McLaren) – 1:29.525
2. Max Verstappen (Red Bull) +0.203
3. Lewis Hamilton (Mercedes) +0.316
4. George Russell (Mercedes) +0.342
5. Oscar Piastri (McLaren) +0.428
6. Nico Hulkenberg (Haas) +0.590
7. Fernando Alonso (Aston Martin) +0.689
8. Yuki Tsunoda (RB) +0.829
9. Charles Leclerc (Ferrari)
10. Carlos Sainz (Ferrari)
11. Alex Albon (Williams)
12. Franco Colapinto (Williams)
13. Sergio Perez (Red Bull)
14. Kevin Magnussen (Haas)
15. Esteban Ocon (Alpine)
16. Daniel Ricciardo (RB)
17. Lance Stroll (Aston Martin)
18. Pierre Gasly (Alpine)
19. Valtteri Bottas (Sauber)
20. Zhou Guanyu (Sauber)

LEXONI GJITHASHTU:

• Norris Pole Position në Hungari
• Verstappen maksimizon dominimin austriak mbi Norris dhe Russell

The post Norris mundi Verstappen për “pole position” në “Singapore GP” appeared first on Euronews Albania.

Interpol Tirana në bashkëpunim me autoritetet italiane kanë ekstraduar dy persona.

Erjon Haxhiu ishte i shpallur në kërkim ndërkombëtar për veprën penale “Kultivimi i bimëve narkotike”.

53-vjeçari akuzohet se ka kultivuar në Milot në ambientet përreth banesës së tij 320 bimë narkotike cannabis, të cilat janë konstatuar nga shërbimet e Komisariatit të Policisë Kurbin në maj të vitit 2022.

Gjykata e Apelit Tiranë Haxhiut i ka caktuar masën e sigurisë “Arrest në burg”.

Në kuadër të operacionit “Para drejtësisë” 53-vjeçari u ekstradua nga Italia në Shqipëri dhe iu dorëzua Drejtorisë së Përgjithshme të Burgjeve.

Ndërsa një 46-vjeçar banues në Krujë u ekstradua drejt Italisë.

Valentino Gjeloshi alias Nino Gjeloshi ishte i shpallur në kërkim ndërkombëtar nga Interpol Roma, pasi Gjykata e Apelit në Firence, në vitin 2022 e ka dënuar me 9 vjet burgim për veprën penale “Grabitje me armë”, kryer në bashkëpunim.

46-vjeçarit i kanë mbetur për të vuajtur 5 vjet, 9 muaj e 16 ditë burg.

LEXONI GJITHASHTU:

• Emri| Në kërkim për grabitje me armë, ekstradohet drejt Italisë 46-vjeçari
• Në kërkim ndërkombëtar nga SPAK, ekstradohet nga Kolumbia 25-vjeçari shqiptar

The post Në kërkim për drogë e grabitje me armë, 2 të ekstraduar drejt Shqipërisë e Italisë appeared first on Euronews Albania.

Ushtria izraelite thotë se e ka “çmontuar pothuajse plotësisht” udhëheqjen e Hezbollahut me sulmin e saj ajror në Bejrut dje.

Sipas mediave të huaja, në një postim në rrjetin social ‘X’, Forcat e Mbrojtjes të Izraelit thanë se një duzinë “terroristë të rëndësishëm” u vranë.

IDF e shoqëroi deklaratën me një imazh që tregonte zinxhirin e komandës ushtarake të Hezbollahut, me fotot e gjashtë personave që mbanin një etiketë të kuqe ku shkruhej “eliminuar”.

“Zinxhiri i komandës ushtarake të Hezbollahut është çmontuar pothuajse plotësisht pasi një duzinë terroristë të rëndësishëm përfshirë, Ibrahim Aqilin u eliminuan dje. Ne do të vazhdojmë të operojmë kundër çdo organizate terroriste që paraqet kërcënim për civilët tanë në të gjitha frontet”, thuhej në deklaratën e IDF.

Kujtojmë se dhjetëra persona mbetën të vdekur dhe qindra të tjerë të plagosur pas shpërthimit të pagerave në Liban dhe sulmeve izraelite në kryeqytetin e vendit, Bejrut.

Hezbollah’s military chain of command has been almost completely dismantled after a dozen significant terrorists including Ibrahim Aqil were eliminated yesterday.

We will continue operating against any terrorist organization that poses a threat to our civilians on all fronts. pic.twitter.com/F2Ewyx4WdL

— Israel Defense Forces (@IDF) September 21, 2024

LEXONI GJITHASHTU:

• Sulmet e Izraelit në Liban, Ministri i Shëndetësisë zbulon bilancin e viktimave
• Sulmet izraelite në Liban| Këshilli i Sigurimit të OKB-së mbledh seancë urgjente

The post Izraeli: Kemi çmontuar thuajse tërësisht udhëheqjen e Hezbollahut me sulmet në Liban appeared first on Euronews Albania.

Lista e Rusisë me vendet që sipas tyre imponojnë “sjellje shkatërruese në kundërshtim me vlerat shpirtërore dhe morale ruse”, mes të cilave janë Greqia dhe Qiproja, u bë publike nga qeveria, pas një vendimi të kryeministrit Mikhail Mishustin.

Sipas mediave greke, lista është një përsëritje e listës së vendeve “jomiqësore” ndaj Rusisë, e cila u krijua pas vendosjes së sanksioneve të ndërsjella, me nisjen e luftës në Ukrainë. Përveç Greqisë dhe Qipros, janë përfshirë pothuajse të gjitha vendet e BE-së, përveç Hungarisë dhe Sllovakisë, si dhe vendet e NATO-s, përveç Turqisë.

Kjo listë përfshin gjithsej 47 vende dhe territore, duke përfshirë SHBA-në, Britaninë e Madhe dhe të gjitha vendet e të ashtuquajturit “koalicioni perëndimor”, pra Japonia, Australia, Zelanda e Re, Koreja e Jugut, por edhe Tajvani.

Sipas agjencisë shtetërore ruse TASS duke cituar burime, lista erdhi si vazhdim i një dekreti të Presidentit Vladimir Putin, sipas të cilit Moska tani e tutje do të ofrojë mbështetje humanitare, si dhe lehtësira për lëvizjen dhe vendosjen e tyre në Rusi për qytetarët e disa vendeve, të cilët sipas tyre “ndajnë vlerat tradicionale shpirtërore dhe morale ruse”.

Dekreti i presidentit rus parashikon një procedurë të thjeshtuar për ata që “nuk pranojnë qëndrimet destruktive neoliberale në vendet e tyre, të cilat janë në kundërshtim me vlerat tradicionale”, për t’u zhvendosur në Rusi. Sipas burimeve diplomatike ruse, numri i qytetarëve perëndimorë që përfitojnë nga ky proces është “tashmë disa dhjetëra”.

LEXONI GJITHASHTU:

• Kapet sasi e madhe droge e arsenal armësh në Greqi, në pranga çifti shqiptar (Emrat)
• U kapën me 585 kilogramë kokainë, dënohen me burg përjetë 5 fierakët në Greqi

The post Mediat në Athinë: Greqia e Qipro në listën ruse të vendeve me “sjellje katastrofike” appeared first on Euronews Albania.

Të tjera detaje kanë dalë mbi numrin e personave të vrarë e të plagosur pas sulmeve të Izraelit në Liban.

Sipas mediave të huaja, Ministri i Shëndetësisë, Firass Abiad, tha se numri i njerëzve të vrarë në një sulm izraelit në Bejrut të premten është rritur në 31.

Tre nga të vrarët ishin fëmijë të moshës gjashtë, katër dhe 10 vjeç. Po ashtu u vranë edhe shtatë gra, si dhe tre shtetas sirianë. Dy personat e plagosur në grevë janë në gjendje kritike, ndërsa 15 ende po trajtohen në spital, konfirmoi ministri i Shëndetësisë.

Ministri tha se operacionet e kërkimit në vendin e grevës ishin ende në vazhdim.

Nga shpërthimet e pajisjeve të martën dhe të mërkurën, 152 persona janë ende në gjendje kritike dhe 777 të tjerë po trajtohen në spital për plagët e tyre, tha Abiad.

Numri i të vrarëve gjatë dy ditëve të shpërthimeve është rritur në 39. Po ashtu 12 persona u vranë në sulmin e së martës dhe numri i të vrarëve të mërkurën shkoi në 27, shtoi ai.

LEXONI GJITHASHTU:

• Izraeli mbyll hapësirën ajrore në veri, shkak cënimi i sigurisë në rajon
• Sulmet izraelite në Liban| Këshilli i Sigurimit të OKB-së mbledh seancë urgjente

The post Sulmet e Izraelit në Liban, Ministri i Shëndetësisë zbulon bilancin e viktimave appeared first on Euronews Albania.

Zëvendëspresidentja e SHBA-së, Kamala Harris, ka folur për gatishmërinë e saj për të përdorur armën e saj nëse një person hyn në shtëpinë e saj.

“Nëse dikush hyn në shtëpinë time, ata do të qëllohen,” tha ajo në një shkëmbim shakash gjatë një ngjarjeje të transmetuar drejtpërdrejt në Michigan me prezantuesen Oprah Winfrey të enjten.

Sipas mediave të huaja, pas një të qeshureje, kandidatja demokrate për presidente vazhdoi: “Me siguri nuk duhet ta kisha thënë këtë, por stafi im do të merret me këtë më vonë”.

Harris, e cila theksoi gjatë debatit të fundit presidencial se ishte pronare e armëve, vazhdoi të përsëriste se mbështeti ndalimin e armëve sulmuese.

Një armë zjarri e atij lloji ishte “fjalë për fjalë projektuar për të qenë një mjet lufte”, i tha ajo Winfrey. “Nuk ka vend në rrugët e një shoqërie civile”.

E pyetur nga Winfrey për të konfirmuar nëse ajo kishte qenë vetë pronare e armëve për “një kohë”, Harris u përgjigj pozitivisht.

Ajo theksoi se ishte një mbështetëse e Amendamentit të Dytë të SHBA-së, i cili mbron të drejtën e posedimit të armëve.

Por ajo vazhdoi të parashtrojë çështjen e saj për ndalimin e armëve sulmuese, duke përmendur problemin e Amerikës me të shtënat në shkolla.

LEXONI GJITHASHTU:

• Trump akuzon Biden dhe Harris se kanë nxitur sulme ndaj tij me retorikën e tyre
• Harris reagon pas të shtënave pranë Trumpit: Dhuna nuk ka vend në Amerikë

The post Shakaja e Kamala Harris: Nëse dikush hyn në shtëpinë time, do të qëllohet me armë appeared first on Euronews Albania.

Policia ka zbuluar një subjekt ku prodhoheshin dhe tregtoheshin oxhakë në Durrës, duke shkelur të drejtat e pronësisë industriale dhe duke fshehur të ardhurat.

Përmes një njoftimi, Policia bën të ditur se në pranga ka rënë një 47-vjeçar, i cili ishte administratori i subjektit.

Ai akuzohet për veprat penale “Shkelja e të drejtave të pronësise industriale”, “Fshehja e të ardhurave” dhe “Mashtrimi”.

Ndërkohë në cilësinë e provës materiale janë sekuestruar 9 oxhakë me vlerë 33 000 euro.

Njoftimi i Policisë:

Durrës-Zbulohet një subjekt ku prodhoheshin dhe tregtoheshin oxhakë, duke shkelur të drejtat e pronësisë industriale dhe duke fshehur të ardhurat.

Vihet në pranga administratori i subjektit.

Sekuestrohen në cilësinë e provës materiale 9 oxhakë me vlerë 33 000 euro.

Seksioni për Hetimin e Krimeve Ekonomiko-Financiare, në vijim të veprimeve hetimore të kryera pas kallëzimit nga një shtetas, se emri i firmës së tij të certifikuar nga Drejtoria e Përgjithshme e Pronësisë Industriale, për prodhimin e oxhakëve, përdorej nga një subjekt tjetër, kanë arrestuar në flagrancë shtetasin G. Ç., 47 vjeç, banues në Durrës, për veprat penale “Shkelja e të drejtave të pronësise industriale”, “Fshehja e të ardhurave” dhe “Mashtrimi”.

Në cilësinë e provës materiale u sekuestruan 9 oxhakë, me vlerë 33 000 euro, të prodhuar në mënyrë të kundërligjshme në subjektin që administronte shtetasi G. Ç.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

LEXONI GJITHASHTU:

• Durrës| Qëlloi me armë zjarri drejt 3 kushërinjve dhe fqinjit, arrestohet 50-vjeçari
• Dhunuan familjarët e tyre, arrestohen 4 persona në Korçë

The post Subjekti tregtonte oxhakë duke shkelur të drejtat e pronësisë, pranga administatorit appeared first on Euronews Albania.

Kryeministri i Shqipërisë, Edi Rama, ka dhënë një intervistë për median italiane ‘La7’, i intervistuar nga Federico Marconi për “Piazza Pulita”, program i drejtuar nga Corrado Formigli.

Rama është shprehur gjatë intervistës se Shqipëria e së ardhmes do të jetë si Italia.

Ai shtoi gjithashtu se kryeministrja italiane Giorgia Meloni është një person shumë real e i drejtpërdrejtë dhe kjo sipas tij është arsyeja që ai nuk ka si të mos ketë një marrëdhënie të mirë me të.

“Kushdo që e njeh Giorgia Melonin nuk mund të mos ketë një marrëdhënie të mirë me të, ajo është një person shumë real dhe i drejtpërdrejtë. Kur më pyesin si do të jetë Shqipëria e së ardhmes, u them të shikojnë Italinë. Kjo është Shqipëria e së ardhmes”, tha Rama.

The post “Meloni, e drejtpërdrejtë”- Rama për ‘La7’: Shqipëria e së ardhmes do jetë si Italia appeared first on Euronews Albania.

Ka ndërruar jetë në QKUK personi i plagosur mëngjesin e sotëm në qendër të Mitrovicës në Kosovë.

Sipas mediave të Kosovës, lajmin e ka konfirmuar zëdhënësi i QKUK-së, Shpend Fazliu.

“Zyra për informim e QKUK-së, ju konfirmon se përkundër përpjekjeve maksimale nga stafi i Klinikës Emergjente, një person i plagosur në Mitrovicë, nuk ka arritur të mbijetojë, për shkak të plagëve që ka pasur dhe gjendjes së rënduar shëndetësore”, ka thënë Fazliu.

Personi i plagosur u dërgua në QKUK nga Emergjenca e Spitalit të Mitrovicës, në gjendje shumë të rëndë, pasi kishte marrë dy plagë në shpinë.

Ndërkohë hetimet vijojnë për zbardhjen e plotë të rrethanave të ngjarjes.

LEXONI GJITHASHTU:

• ​Raportohet për të shtëna me armë zjarri në Mitrovicë, dyshohet për të lënduar
• Osmani bisedon me zyrtarin e lartë të NATO-s për çështjen e urës në Mitrovicë

The post Kosovë| U sulmua me armë mëngjesin e sotëm, vdes personi i plagosur në Mitrovicë appeared first on Euronews Albania.

Përgjegjësi i një qendre sociale në Elbasan ka denoncuar në Polici se ditën e djeshme janë larguar nga ambientet e kësaj qendre 3 shtetas të mitur (dy 13-vjeçarë dhe një 14-vjeçar).

Përmes një njoftimi, Policia bën të ditur se pas kallëzimit po vijon puna në terren për gjetjen e tyre.

Ndërkohë materialet procedurale i kaluan Prokurorisë së Elbasanit për veprime të mëtejshme.

Njoftimi i Policisë:

Drejtoria Vendore e Policisë Elbasan

Më datë 19.09.2024,  ka kallëzuar shtetasi R. P., 37 vjeç, me detyrë përgjegjës i një qendre sociale në Elbasan, se ditën e djeshme, janë larguar nga ambientet e kësaj qendre, 3 shtetas të mitur (dy 13-vjeçarë dhe një 14-vjeçar). Vijon puna për gjetjen e tyre.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.

The post 3 të mitur largohen nga qendra sociale në Elbasan, përgjegjësi denoncon në Polici appeared first on Euronews Albania.

1600 – Afërsisht 1600 prozhektorë të fuqishëm janë shpërndarë në mënyrë të njëtrajtshme në 4.940 km e “Marina Bay Circuit”. Prodhojnë një ndriçim 4 herë më të shndritshëm se një stadium futbolli dhe janë projektuar të minimizojnë reflektimin e pistës për të përmbushur standartet transmetimit televiziv që kërkohen nga FIA.

1 – Çmimi i Madh i Singaporit është i pari që zhvillohet natën. Ai debutoi në botërorin e vitit 2008.

14 – Në çdo edicion të zhvilluar deri tani, “Safety Car” ka qënë e pranishme të paktën një herë në pistë.

15 – Fitorja e Carlos Sainz një vit më parë i dha fund serisë prej 15 fitoreve rradhazi të Red Bull. Ecuria më e gjatë për një skuadër në historinë e Formula 1.

0.293 – Fitorja e Fernando Alonso’s në vitin 2010 kishte diferencën më të ngushtë në historinë e garës. Vetëm 0.293” përpara vendit të dytë ku u rendit Sebastian Vettel.

5 – Lewis Hamilton ka mundësi të barazojë rekordin e fitoreve të Sebastian Vettel (5) në Singapor. Britaniku numëron 4 fitore, të parën në bordin e Mclaren në vitin 2009 dhe 3 të tjerat në bordin e Mercedes në vitet 2014, 2017, 2018.

2 – Dy pilotë të tjerë që vendosën “pole position” do të kthehen këtë fundjavë në Singapor. Fernando Alonso u nis i 1’ri në vitin 2010 me Ferrari dhe Sainz një vit më parë me të njëjtën makinë.

4 – Vettel dhe Hamilton kanë secili nga 4 “Pole positions” në “Marina Bay Circuit”. Charles Leclerc është piloti tjetër që u nis i 1’ri në vitet 2019 dhe 2022.

200 – Carlos Sainz pritet të startojë garën e 200’të në karrierë këtë fundjavë. Piloti spanjoll debutoi në Formula 1 në bordin e Toro Rosso’s (sot Racing Bulls) në “2015 Australian Grand Prix”.

LEXONI GJITHASHTU:

• Monza, Tempulli i Shpejtësisë në Formula 1
• FIA dhe Formula 1 zyrtarizojnë eventet Sprint 2025

The post Çfarë duhet të dini për Garën në Singapor appeared first on Euronews Albania.