Kosova rrezikon të mbetet jashtë Procesit të Berlinit, shkak masa e sigurisë me Serbinë
Kosova mund të mbetet jashtë procesit të Berlinit nëse nuk reflekton në kërkesën që Manuel Sarrazin i’a bëri për përfaqësimin e saj në CEFTA, vlerësojnë ekonomistët. Një mundësi të tillë e përmendi edhe vet emisari gjerman, i cili po kërkon heqjen e ndalesës së importit të mallrave serbe, si masë e sigurisë. Ekonomistët thonë që Kosova mund të mbetet e izoluar nga refuzimi për heqjen e kësaj mase.
Brenda më pak se 10 ditësh, përfaqësuesi i Gjermanisë për Ballkanin Perëndimor Manuel Sarrazin vizitoi dy herë Kosovën.
Herën e dytë foli në publik për vendimmarrjen në CEFTA, që është bllokuar për shkak të mospajtimeve të Kosovës në lidhje me përfaqësimin e saj në këtë mekanizëm.
Ani pse duket që Kosova arriti një marrëveshje me Sarrazin në lidhje me këtë aspekt, kushti i Serbisë ndaj Kosovës për heqjen e ndalimit të importit të mallrave serbe, bllokoi prapë këtë marrëveshje.
Kështu, kishte thënë ambasadori gjerman në Kosovë Jorn Rohde që me anë të një postimi në platformën X tha se ka tërhequr vërejtjen se nëse është e nevojshme do të vazhdohet pa Kosovën në këtë proces.
Jeton Zulfaj, këshilltari i kryeministrit të Kosovës, Albin Kurti, ka thënë se në samitin që do të mbahet me 14 tetor, është e rëndësishme të ketë rezultate konkrete drejt synimeve të Procesit të Berlinit.
Duke folur për kritikat e emisarit special gjerman ndaj Kosovës në lidhje me CEFTA-n, Zulfaj thotë se Kosova është treguar konstruktive në këtë proces duke kontribuar për një zgjidhje kompromisi.
“Procesi i Berlinit nuk ka një listë të gjërave që janë vetëm në proces, por merr nga iniciativat e ndryshme, duke përfshirë edhe ato që janë në kuadër të tregut të përbashkët rajonal, por ndonjëherë kontribuon edhe në zgjidhjet e çështjeve bilaterale…Besoj se në këtë drejtim është deklarata e Sarrazin që lidhet me vendimet që udhët t’i marrin në CEFTA, ku shumica e tregut të përbashkët rajonal varet nga mënyra sesi funksionon CEFTA….Ka të bëjë me vendime që janë në CEFTA dhe janë një listë që po presin vendimmarrje”, tha ai.
Kurse ish-kryetari i Odës Ekonomike të Kosovës, Safet Gërxhaliu thotë se nëse Kosova nuk e zgjidhë këtë çështje me përfaqësuesin gjerman atëherë ka vetëm tri alternativa.
“E para është izolimi, alternativa e dytë është ecja përpara e Ballkanit Perëndimor dhe CEFTA-së me formulën e re 6 minus 1, dhe e treta definitivisht fuqizimi i Ballkanit të Hapur i cili zanafillën e ka në Beograd”, tha ai.
Gërxhalliu thotë se Kosova mund të mbetët jashtë, nëse nuk reflekton.
“Procesi të vazhdohet pa Kosovën, të kemi një formulë të re të funksionimit të Ballkanit Perëndimor, me 6 minus 1 dhe ai minusi të jetë Kosova, dhe nëse vazhdohet në këtë mënyrë do të fuqizohet Ballkani i Hapur”, shtoi ai.
Për të koordinuar agjendën e samitit në tetor, emisari gjerman Sarrazin ka qëndruar javën e kaluar dhe këtë javë në vendet e rajonit dhe në Kosovë.
The post Kosova rrezikon të mbetet jashtë Procesit të Berlinit, shkak masa e sigurisë me Serbinë appeared first on Telegrafi.